Iminungkahi ng Department of the Interior and Local Government (DILG) ang pagbuwag sa kasalukuyang setup ng MIMAROPA at pagbabalik nito sa Region 4, upang gawing mas mabilis at praktikal ang pagtugon ng pamahalaan sa mga lalawigang pulo.
Inihayag ni DILG Secretary Jonvic Remulla ang panukala sa pagdinig ng Senate Finance Subcommittee J nitong Huwebes, matapos itanong ni Sen. Erwin Tulfo kung maaaring magkaroon ng sea transport ang Philippine National Police (PNP) para sa regional director nito sa MIMAROPA.
Ayon kay Remulla, mahirap para sa mga regional director at iba pang ahensya na epektibong magampanan ang kanilang tungkulin sa kasalukuyang setup dahil hindi naman aktuwal na nakabase sa Calapan City, Oriental Mindoro ang maraming regional offices.
“As of now, sir, it’s almost impossible to be regional director of any agency to be in 4B. And no one is in Calapan except for the PNP,” ani Remulla.
Binigyang-diin niya na may mga tanggapan ng mga ahensyang nagsisilbi sa MIMAROPA na nakabase sa labas ng Calapan. Kabilang dito ang DILG Region 4B office na nasa Quezon City.
Dahil dito, iminungkahi ng DILG na ibalik ang mga lalawigan sa ilalim ng Region 4, ngunit hahatiin ang mga ito sa magkakahiwalay na command centers batay sa kanilang lokasyon at accessibility.
Sa ilalim ng panukalang setup, pagsasama-samahin ang Cavite at Palawan, Batangas at Mindoro, Laguna at Rizal, habang magkakagrupo naman ang Quezon, Marinduque at Romblon.
Ayon kay Remulla, mas magiging “rationalized” at responsive ang government functions sa ganitong sistema dahil mas isasaalang-alang nito ang heograpiya, oras ng paglalakbay at aktuwal na paghahatid ng serbisyo sa mga lalawigan.
“Iyan ang gusto naming gawin—ibalik ito sa Region 4, into one region, but divide it into different command centers,” ani Remulla.
Nabanggit naman ni Sen. Tulfo ang hirap na nararanasan ng PNP MIMAROPA regional director sa pagbisita sa mga island province. Aniya, ang pagpunta mula Mindoro patungong Palawan ay maaaring mangailangan pa ng pagdaan sa Maynila.
Dahil dito, tinanong niya kung maaaring bumili ang PNP ng mga sasakyang pandagat upang direktang makabiyahe ang regional director sa mga lalawigan sa halip na dumaan pa sa Maynila.
Sinabi naman ni PNP chief Gen. Jose Melencio Nartatez Jr. na kabilang sa isinasaalang-alang sa police procurement program ang pagbili ng mga sasakyan at watercraft, gayundin ang mga kinakailangang gastusin para sa kanilang maintenance.
Gayunman, sinabi ni Remulla na hindi lamang karagdagang sasakyan o sasakyang pandagat ang kailangan upang matugunan ang problema, kundi isang mas malawak na pagbabago sa estruktura ng rehiyon.
Ayon sa kalihim, nakatakdang isumite ng DILG sa Senado sa loob ng taon ang panukalang reorganisasyon ng Region 4.
“We will propose it to the Senate this coming year, sir. And hopefully it will be supported,” ani Remulla.
