Iginiit ng Altai Philippines Mining Corporation (APMC) ang kahandaan nitong harapin ang anumang lehitimong imbestigasyon sa mga aktibidad nito sa Sibuyan Island, kasunod ng paghahain ng Makabayan bloc ng resolusyon sa Kamara para siyasatin ang operasyon ng kumpanya.
Naghain nitong September 9 ang mga mambabatas mula sa Makabayan bloc ng resolusyon na humihiling sa House Committee on Natural Resources na magsagawa ng imbestigasyon kaugnay ng mga usapin sa operasyon ng APMC sa Sibuyan.
Sa inilabas na pahayag ng APMC, sinabi ng kumpanya na tinatanggap nito ang anumang lehitimong inquiry bilang pagkakataon upang maipakita ang mga katotohanan, linawin ang mga maling pananaw at maipaliwanag sa pamahalaan at publiko ang kalikasan at kasalukuyang estado ng mga aktibidad nito sa Sibuyan.
Ayon sa APMC, kasalukuyang limitado ang kanilang mga aktibidad sa care and maintenance at paghahanda ng mga technical studies alinsunod sa mga kinakailangan ng pamahalaan.
Iginiit din ng kumpanya na mayroon itong balidong Mineral Production Sharing Agreement (MPSA) sa Philippine government at patuloy nitong tinutupad ang mga obligasyon nito sa ilalim ng naturang kasunduan.
Binigyang-diin ng APMC na hindi pa ito nagsasagawa ng commercial mining operations sa Sibuyan.
Samantala, mariing itinanggi ng kumpanya ang mga alegasyon ng “militarization” ng kanilang operasyon.
Ayon sa APMC, walang military forces na sangkot sa pagsasagawa ng mga aktibidad ng kumpanya. Sinabi rin nitong kinikilala nito ang kahalagahan ng pagpapanatili ng peace and order at paggalang sa karapatan ng mga Sibuyanon, kabilang ang mga may pangamba tungkol sa panukalang proyekto.
Iginiit ng kumpanya na anumang isyu na may kinalaman sa law enforcement personnel ay dapat tugunan sa pamamagitan ng mga kinauukulang awtoridad at umiiral na legal na proseso, batay sa mga katotohanan at ebidensya.
Kasabay nito, sinabi ng APMC na iginagalang nito ang karapatan ng bawat Sibuyanon na magpahayag ng kanilang pananaw tungkol sa pagmimina at sa magiging kinabukasan ng isla.
Gayunman, nais din umano ng kumpanya na marinig ang panig ng mga naniniwalang maaaring maging mapagkukunan ng trabaho, kabuhayan at oportunidad sa ekonomiya ang responsableng pagpapaunlad ng yamang mineral.
Ayon sa APMC, nararapat na maging bahagi ang magkakaibang pananaw at adhikain sa isang patas, balanse at nakabatay sa ebidensyang talakayan hinggil sa kinabukasan ng Sibuyan.
