Itinalaga si Emmy Lou V. Delfin, kasalukuyang Regional Director ng Department of Information and Communications Technology (DICT) MIMAROPA, bilang Officer-in-Charge (OIC) Assistant Secretary for Regional Development ng kagawaran.
Ang designation ay bahagi ng leadership reshuffle sa DICT sa ilalim ni Secretary Henry R. Aguda, batay sa Department Order No. HRA-020 na may petsang Agosto 10, 2026.
Sa kanyang bagong tungkulin, direktang magre-report si Delfin kay Assistant Secretary Christian Mark Guingcangco, na itinalaga namang OIC Undersecretary for Special Concerns.
Si Delfin ay kasalukuyang namumuno sa DICT MIMAROPA at naging bahagi ng pagpapatupad ng mga programa ng kagawaran sa rehiyon, kabilang ang pagpapalawak ng digital connectivity at access sa teknolohiya. Sa ilalim ng kanyang pamumuno, isinulong ng DICT MIMAROPA ang mga programa tulad ng Free Wi-Fi for All at iba pang digital inclusion initiatives.
Sa pamamagitan ng bagong tungkulin ni Delfin, inaasahang higit na mapapalakas ang koordinasyon ng DICT sa mga regional offices at ang pagpapatupad ng mga programa para sa digital connectivity at ICT development sa iba't ibang rehiyon.
