Inaprubahan ng Development Administration Committee (DAC) ang isang resolusyong nagsusulong na magtalaga o mag-appoint ang lahat ng National Government Agencies (NGAs) at Local Government Units (LGUs) sa MIMAROPA ng kani-kanilang Public Information Officer (PIO).
Iprinisenta ni PIA MIMAROPA Regional Head Jemin Guillermo ang draft resolution sa isinagawang 3rd Quarter DAC Meeting nitong August 6 sa Quezon City. Matapos ang talakayan, inaprubahan ng komite ang panukala at inendorso ito para sa pagtalakay sa susunod na pulong ng Regional Development Council (RDC) sa Setyembre.
Ayon sa panukala, ang pagtatalaga ng mga dedikadong PIO ay makatutulong sa pag-institutionalize ng strategic government communication, pagpapalakas ng koordinasyon sa pagitan ng mga ahensya, at pagpapabuti ng access ng publiko sa tama, napapanahon, at mapagkakatiwalaang impormasyon.
Layunin din ng resolusyon na mapalakas ang kampanya laban sa misinformation at disinformation, maisulong ang transparency at citizen engagement, at mapataas ang tiwala ng publiko sa mga programa at inisyatiba ng pamahalaan sa rehiyon.
Kapag inaprubahan ng RDC, inaasahang magsisilbi itong gabay sa mga ahensya ng pamahalaan at mga lokal na pamahalaan sa MIMAROPA sa pagtalaga ng mga opisyal na mangangasiwa sa kanilang public information and communication initiatives.
