Magsasagawa ng dalawang araw na panalangin, pakikiisa at mapayapang pagkilos para sa kalikasan ang mga parokya at iba pang grupo sa Sibuyan Island bilang bahagi ng patuloy na paninindigan para sa pangangalaga ng kagubatan, kabundukan, karagatan at kinabukasan ng isla.
Sa Biyernes, Agosto 21, gaganapin ang Ecological and Solidarity Mass bandang alas-4 ng hapon, na inorganisa ng St. Vincent Ferrer Parish Multi-Purpose Cooperative o St. Vincent Coop.
Makikiisa sa naturang misa ang mga kaparian mula sa Tablas, Romblon at Sibuyan upang manalangin at magpahayag ng pakikiisa sa mga pamayanang nagsusulong ng pangangalaga sa kalikasan at pagtatanggol sa Sibuyan.
Samantala, sa Sabado, Agosto 22, magsasagawa naman ang Vicariate of Santa Barbara ng Vicariate Prayer Caravan and Mass na iikot sa iba’t ibang bahagi ng Sibuyan Island.
Magsisimula ang caravan mula sa Parish of Sto. Niño sa Danao, Cajidiocan, at tutungo sa Parish of Santa Barbara sa Poblacion, Cajidiocan, kung saan makikiisa rin ang mga manggagaling sa Parish of St. Thérèse of the Child Jesus.
Bandang alas-7:30 ng umaga, sabay-sabay na tutungo ang mga kalahok mula Cajidiocan patungong San Fernando at daraan sa Parish of Our Lady of Candles sa Azagra.
Bandang alas-8 ng umaga, magtitipon ang mga kalahok sa Diocesan Shrine and Parish of Our Lady of the Immaculate Conception sa Poblacion, San Fernando para sa sama-samang panalangin para sa kalikasan.
Mula rito, tutungo ang caravan sa Barikada ng Mamamayan ng Sibuyan sa Sitio Bato, kung saan gaganapin ang Banal na Misa sa Parish of Our Lady of Remedies bandang alas-9:30 ng umaga kasama ang mga kaparian ng Vicariate of Santa Barbara.
Pagkatapos ng misa, magpapatuloy ang caravan patungo sa Parish of Our Lady of the Most Holy Rosary sa Magdiwang bago ipagpatuloy ang pag-ikot sa iba pang bahagi ng Sibuyan.
Ayon sa mga organizer, layunin ng aktibidad na pag-isahin ang mga mamamayan sa panalangin at mapayapang pagkilos para sa buhay, kalikasan at kinabukasan ng Sibuyan.
Hinihikayat naman ang mga nais makilahok na makipag-ugnayan sa kani-kanilang mga parokya para sa assembly points, mga tagubilin at iba pang detalye kaugnay ng caravan.
Discussion about this post