Inaasahang makararanas ng maulap na kalangitan na may kalat-kalat na pag-ulan at thunderstorms ang Romblon simula Linggo dahil sa isang Low Pressure Area (LPA) na binabantayan ng Philippine Atmospheric, Geophysical and Astronomical Services Administration (PAGASA) sa loob ng Philippine Area of Responsibility (PAR).
Sa weather advisory ng PAGASA alas-3:00 ng hapon nitong Sabado, namataan ang LPA sa layong 595 kilometro silangan ng Infanta, Quezon.
Bukod sa Romblon, inaasahan ding makakaranas ng maulap na kalangitan na may kalat-kalat na pag-ulan at thunderstorms ang Metro Manila, Visayas, Bicol Region, CALABARZON, Occidental Mindoro, Oriental Mindoro, Cagayan, Isabela, at Aurora.
Samantala, ang nalalabing bahagi ng bansa ay makakaranas ng bahagyang maulap hanggang maulap na kalangitan na may mga pulu-pulong pag-ulan o thunderstorms dulot ng localized thunderstorms.
Nagbabala ang PAGASA sa posibilidad ng flash floods at pagguho ng lupa sa mga lugar na makakaranas ng malalakas na pag-ulan o matitinding thunderstorms.
Ayon pa sa state weather bureau, inaasahan ang mahina hanggang katamtamang lakas ng hangin at banayad hanggang katamtamang kondisyon ng karagatan sa buong bansa, na may taas ng alon na 0.6 hanggang 1.5 metro.
Discussion about this post