Sinimulan na ng Pamahalaang Panlalawigan ng Romblon ang ikalawang tranche ng pamamahagi ng ayudang bigas para sa mga kwalipikadong benepisyaryo sa iba't ibang bayan ng lalawigan sa ilalim ng Rice Assistance Program at Bawat Bayan Makikinabang Program.
Ngayong Nobyembre 20, nakatakdang tumanggap ng kanilang alokasyon ang mga kwalipikadong residente ng Santa Maria bilang bahagi ng pagpapatuloy ng programa na pinondohan sa pamamagitan ng Local Government Support Fund (LGSF) ng pambansang pamahalaan sa ilalim ng administrasyon ni Pangulong Ferdinand “Bongbong” Marcos Jr.
Sa unang tranche ng pamamahagi noong Oktubre, umabot sa 23,879 mahihirap na pamilya sa Romblon ang nakatanggap ng tig-10 kilo ng bigas matapos maglaan ang pamahalaan ng mahigit ₱46 milyon para sa programa.
Mula sa paunang alokasyon na nasa 21,000 pamilya, nadagdagan ang bilang ng mga benepisyaryo matapos maglaan ng karagdagang pondo ang pamahalaang panlalawigan sa pamumuno ni Governor Trina Firmalo-Fabic.
Layunin ng programa na makatulong sa mga pamilyang nangangailangan at maibsan ang kanilang gastusin sa pangunahing pangangailangan, partikular sa pagkain.
Inaasahang magpapatuloy ang pamamahagi sa iba pang bayan ng lalawigan upang maihatid ang ayudang bigas sa mga kwalipikadong pamilya.


























