Hihingi ng tulong kay Pangulong Ferdinand R. Marcos Jr. ang tatlong munisipalidad sa Isla ng Sibuyan upang matugunan ang patuloy na krisis sa suplay ng kuryente, matapos magdeklara ng State of Calamity due to Energy Crisis ang mga lokal na pamahalaan dahil sa sunod-sunod at matagal na brownout sa isla.
Napagkasunduan ito sa isinagawang joint session ng mga vice mayor at miyembro ng sangguniang bayan ng Cajidiocan, Magdiwang, at San Fernando, kung saan tinalakay ang kasalukuyang sitwasyon ng suplay ng kuryente at ang mga hakbang na isinasagawa ng National Power Corporation (NAPOCOR) at Romblon Electric Cooperative (ROMELCO).
Dumalo rin sa pagpupulong sa pamamagitan ng Zoom si ROMECLO General Manager Rene Fajilagutan, at ang kinatawan ng NAPCOOR, na naglatag ng short-term at long-term plans ng dalawang ahensya upang mapatatag ang suplay ng kuryente sa Sibuyan.
Gayunman, ayon kay Cajidiocan Mayor Marvin Ramos, inamin sa pulong na sa kabila ng mga kasalukuyang hakbang ay wala pa ring kasiguruhan na magiging sapat ang power supply upang tuluyan nang maiwasan ang matagal na brownout sa isla.
Bilang tugon, magpapasa ang tatlong sangguniang bayan ng mga resolusyon na humihiling ng agarang tulong kay Pangulong Marcos, Romblon Governor Trina Alejandra Firmalo-Fabic, at Congressman Eleandro Jesus “Budoy” Madrona upang maipaabot sa mga kinauukulang pambansang ahensya ang suliranin at mapabilis ang pagpapatupad ng pangmatagalang solusyon.
Ayon kay Ramos, layunin ng deklarasyon ng State of Calamity due to Energy Crisis na mapabilis ang pagresponde ng mga ahensya ng pamahalaan at ang implementasyon ng mga kinakailangang hakbang upang maresolba ang patuloy na problema sa suplay ng kuryente na nakaaapekto sa mga residente, negosyo, at iba pang sektor sa Isla ng Sibuyan.
