Itinaas ng Police Regional Office (PRO) MIMAROPA ang antas ng seguridad sa Romblon at iba pang lalawigan sa rehiyon bilang paghahanda sa 2026 State of the Nation Address (SONA) ni Pangulong Ferdinand R. Marcos Jr. ngayong July 27.
Sa direktiba ni PRO MIMAROPA Regional Director PBGEN Christopher R. Dela Cruz, inatasan ang lahat ng police units na paigtingin ang police visibility, intelligence monitoring, at pagbabantay sa mahahalagang pasilidad at critical infrastructure upang mapanatili ang kapayapaan at kaayusan sa kanilang mga nasasakupan.
Kabilang sa mga ipinatutupad na hakbang ang mas pinaigting na pagpapatrolya at pagdaragdag ng presensya ng pulisya sa mga pampublikong lugar, transport terminals, pantalan, paliparan, mga gusali ng pamahalaan, at iba pang mahahalagang lugar. Nakaalerto rin ang mga contingency response teams upang agad na tumugon sa anumang banta sa seguridad.
Patuloy ding nakikipag-ugnayan ang PRO MIMAROPA sa Armed Forces of the Philippines (AFP), Philippine Coast Guard (PCG), Bureau of Fire Protection (BFP), mga lokal na pamahalaan, at iba pang partner agencies upang matiyak ang maayos at mapayapang pagdaraos ng SONA.
Inatasan din ang mga police commander na bantayang mabuti ang anumang public assembly sa kanilang nasasakupan habang tinitiyak ang paggalang sa karapatang magpahayag at mapayapang magtipon, alinsunod sa umiiral na batas at operational procedures.
Ayon kay Dela Cruz, nananatiling handa ang PRO MIMAROPA na tiyakin ang kaligtasan ng publiko habang iginagalang ang mga karapatang nakasaad sa Konstitusyon.
“As the nation observes this important democratic event, we have directed all police units across MIMAROPA to remain vigilant, strengthen police visibility, and stay fully prepared to respond to any situation that may affect public safety. We will continue to uphold the constitutional rights of every Filipino while ensuring that our communities remain peaceful, orderly, and secure,” ani Dela Cruz.
Hinikayat din ng opisyal ang publiko na makiisa sa pagpapanatili ng seguridad sa pamamagitan ng agarang pag-uulat sa pinakamalapit na himpilan ng pulisya ng anumang kahina-hinalang tao, aktibidad, o bagay upang mapanatiling ligtas at mapayapa ang Romblon at buong rehiyon sa panahon ng SONA.
Discussion about this post