Inilunsad ng Living Laudato Si' Philippines ang isang online petition na nananawagan kay Pangulong Ferdinand R. Marcos Jr. na ipatigil ang planong operasyon ng Altai Philippines Mining Corporation (APMC) sa Sibuyan Island, Romblon.
Sa petisyon, hiniling ng mga nagsusulong nito na kanselahin ang Mineral Production Sharing Agreement (MPSA) ng kumpanya at bigyang-priyoridad ang pangangalaga sa natatanging biodiversity, mga watershed, at kabuhayan ng mga residente ng Sibuyan. Ayon sa kanila, ang pagmimina ay maaaring magdulot ng pinsala sa mga kagubatan, ilog, at iba pang likas na yaman ng isla.
Ang panawagan ay kasunod ng muling pag-usbong ng isyu ng pagmimina sa Sibuyan at ng mga panawagan mula sa iba't ibang sektor na protektahan ang isla, na kilala bilang “Galapagos of Asia” dahil sa mayamang biodiversity nito.
Matatandaang nitong nakalipas na linggo, inaprubahan ng Sangguniang Bayan ng San Fernando ang isang resolusyon na nag-eendorso sa aplikasyon ng APMC para sa Declaration of Mining Project Feasibility (DMPF) at sa ipinanukalang mining operations nito sa bayan.
Ang endorsement ay isa sa mga dokumentong kinakailangan sa aplikasyon ng kumpanya, na mananatili pa ring sasailalim sa pagsusuri, pag-apruba, at iba pang kinakailangang permit mula sa mga kinauukulang ahensya ng pamahalaan alinsunod sa umiiral na mga batas at regulasyon.
