Muling iginiit ng Malacañang na mahigpit na ipinagbabawal ng Philippine Mining Act of 1995 ang pagmimina sa loob ng mga watershed at iba pang environmentally protected areas.
Sa press briefing nitong Martes, sinabi ni Presidential Communications Office (PCO) Undersecretary at Palace Press Officer Claire Castro na binigyang-diin ng Department of Environment and Natural Resources (DENR) na nakasaad sa Section 19(f) ng Republic Act No. 7942 na hindi maaaring magkaroon ng mineral agreements sa loob ng mga idineklarang watershed forest reserves.
Bukod sa mga watershed, ipinagbabawal din ng batas ang pagmimina sa mga old-growth o virgin forests, wilderness areas, mangrove forests, mossy forests, national parks, provincial at municipal forests, game refuges, bird sanctuaries, at iba pang mga lugar na protektado sa ilalim ng National Integrated Protected Areas System (NIPAS) Act at iba pang umiiral na batas.
Nilinaw ni Castro ang polisiya ng pamahalaan bilang tugon sa mga tanong kaugnay ng mga alegasyong naapektuhan ang suplay ng tubig sa Surigao City dahil umano sa pagmimina.
Ayon sa kanya, walang naitalang mining operation sa loob ng Parang-Parang Watershed at wala ring ebidensiyang nagpapatunay na ang kakulangan sa suplay ng tubig sa Surigao City ay dulot ng pagmimina.
Sinabi rin ni Castro na batay sa ulat ng DENR at sa resulta ng environmental monitoring ng Mines and Geosciences Bureau (MGB) Regional Office XIII, walang natukoy na pang-aabuso sa mga watershed na may kaugnayan sa mga operasyon ng pagmimina sa Surigao del Norte.
Gayunman, hinikayat ng Malacañang ang sinumang may ebidensya ng mga paglabag sa kalikasan na isumite ito sa DENR upang maimbestigahan at maisagawa ang kaukulang aksyon.
