Iginiit ng Altai Mining Philippines Corporation (APMC) na hindi sakop ng kanilang mining operations ang Mt. Guiting-Guiting Natural Park, ayon sa isang video na inilabas ng kumpanya.
Sa naturang video, sinabi ng APMC na may nakalaang buffer zone sa pagitan ng protected area at ng Mineral Production Sharing Agreement (MPSA) ng kumpanya.
Ayon din sa APMC, pansamantala lamang ang paggamit ng lupa para sa pagmimina at hindi ito permanenteng pagbabago sa gamit ng lugar.
“Isa pang mahalagang katotohanan, ang pagmimina ay hindi permanenteng paggamit ng lupa. Temporary land use lamang ito,” ayon sa kumpanya.
Sinabi rin ng APMC na nagpapatuloy ang rehabilitasyon habang isinasagawa ang operasyon ng pagmimina.
Ayon sa kumpanya, sa bawat isang punong maaapektuhan ng operasyon ay magtatanim ito ng 100 bagong puno bilang kapalit.
Binigyang-diin din ng APMC na layunin ng responsableng pagmimina ang maingat na pagkuha ng mga yamang mineral habang pinangangalagaan ang kalikasan.
“Ang layunin ng responsableng pagmimina ay ang maingat na pagkuha ng mineral habang pinangangalagaan ang kalikasan,” ayon pa sa kumpanya.
Inilabas ng APMC ang naturang video habang nagpapatuloy ang magkakaibang pananaw ng iba't ibang sektor hinggil sa pagmimina sa Sibuyan Island.
Discussion about this post