Arestado ang isang suspek na umano’y sangkot sa panlilinlang gamit ang QR code na nambiktima ng ilang tindahan sa Sibuyan matapos maaresto sa Romblon Port sa bayan ng Romblon nitong Huwebes.
Batay sa ulat, ang suspek ay naglibot sa mga tindahan sa isla at nagpapacash-in gamit ang GCash QR code. Matapos ang transaksyon, nakaranas umano ng hindi awtorisadong withdrawals ang ilang tindahan.
Dalawang tindahan ang nag-ulat ng insidente, kabilang ang isa sa Barangay Campalingo kung saan may naitalang sunod-sunod na withdrawal sa pamamagitan ng Lazada na nagkakahalaga ng ₱1,000 at apat na transaksyong tig-₱10,000, na umabot sa kabuuang ₱41,000.
Isa pang tindahan sa Poblacion ang nakaranas din umano ng apat na transaksyong tig-₱20,000 na umabot sa ₱80,000.
Pinaghihinalaang ginamit ang QR code para sa phishing na naglalaman ng link na maaaring nakakuha ng access sa account ng mga biktima matapos ang transaksyon.
Naaresto ang suspek sa Romblon Port matapos umano itong tumakas mula sa isla.
Patuloy ang imbestigasyon ng mga awtoridad kaugnay ng insidente at hinihikayat ang publiko, lalo na ang mga tindahan na nag-aalok ng cash-in at cash-out services, na maging maingat sa paggamit ng QR code at tiyaking beripikado ang mga transaksyon.
