Posibleng maapektuhan ang operasyon ng Starhorse Shipping Company kabilang ang biyahe nito patungong mga isla ng Romblon matapos lumabas sa ulat ng Abante na maaaring hindi muna makagamit ng mga pasilidad ng Philippine Ports Authority (PPA) ang ilang barko ng kompanya.
Ayon sa ulat ng Abante, may umano’y halos P10 milyong pagkakautang ang Starhorse Shipping sa PPA na kaugnay ng mga multang ipinataw sa serye ng paglabag sa mga patakaran ng ahensya. Nakasaad sa mga dokumentong nakuha ng Abante na ang mga paglabag ay may kinalaman sa compulsory disposal of vessel-generated wastes na naitala mula Pebrero 19, 2025 hanggang Pebrero 11 ngayong taon.
Batay sa parehong ulat, tinatayang nasa humigit-kumulang P9.5 milyon ang kabuuang penalty at posibleng lumampas sa P10 milyon kung maisasama ang mga paglabag nitong buwan ng Marso. Nabanggit din na napaso na umano noong Enero ng nakaraang taon ang accreditation ng kompanya sa PPA at maaari lamang itong maibalik kapag nabayaran ang naturang obligasyon.
Mahalagang ruta para sa mga pasahero at kargamento ang biyahe ng Starhorse Shipping mula Lucena City patungong mga isla ng Romblon, na may regular na araw-araw na operasyon. Dahil dito, posibleng makaapekto sa mga biyahero at kalakalan sa lalawigan kung tuluyang hindi makagamit ng pasilidad ng PPA ang mga barko ng kompanya.
Sa ngayon, wala pang inilalabas na opisyal na pahayag ang Starhorse Shipping hinggil sa naturang ulat, habang inaabangan din ang kumpirmasyon mula sa PPA kaugnay sa estado ng operasyon ng shipping line.
