Nanawagan si House Minority Leader at 4Ps Representative Marcelino Libanan sa Regional Tripartite Wages and Productivity Boards na magmadali sa paglalabas ng bagong minimum wage order, lalo na sa mga rehiyong hanggang ngayon ay wala pang umento, kabilang ang MIMAROPA.
Ayon kay Libanan, matagal nang ramdam ng minimum wage earners ang bigat ng pagtaas ng presyo ng mga bilihin, kaya’t hindi dapat maantala ang pag-aksyon ng natitirang wage boards.
Base sa datos ng National Wages and Productivity Commission hanggang Nobyembre 3, 11 sa 17 regional boards na ang nagpalabas ng wage increase ngayong taon. Hindi pa kabilang dito ang MIMAROPA, Cordillera Administrative Region, Eastern Visayas, Zamboanga Peninsula, Northern Mindanao, at Caraga.
“We are counting on the six remaining regional wage boards to promptly raise pay rates and give workers the immediate relief they deserve amid the continuing surge in the cost of living,” ayon kay Libanan, sabay-diin na bawat linggong delay ay “further erosion of workers’ purchasing power.”
Ipinaliwanag ni Libanan na maaaring magtaas ng sahod ang mga wage board kahit walang nakabinbing petition, ngunit isang wage order lamang ang maaaring ipalabas kada 12 buwan.
Binigyang-diin niya na hindi lamang usapin ng katarungan ang umento sa sahod, kundi kritikal din ito para sa muling pagbangon ng ekonomiya.
“The country urgently needs wage adjustments to revive household consumption spending, which has been weakened by months of wage erosion caused by sustained price hikes,” dagdag niya, na iginiit ding mahalaga ang mas mataas na household spending upang mapalakas ang demand, mapabilis ang paglago ng ekonomiya, at lumikha ng mas maraming trabaho.
