Nakataas na ang Tropical Cyclone Wind Signal No. 1 sa lalawigan ng Romblon ngayong Linggo dahil sa pagtawid ni bagyong ‘Ramil' sa Luzon, ayon sa Philippine Atmospheric, Geophysical and Astronomical Services Administration (PAGASA).
Sa ulat ng PAGASA alas-4:00 ng umaga, namataan ang sentro ng bagyong Ramil sa karagatang sakop ng Alabat, Quezon. Taglay nito ang lakás ng hangin na 65 kilometro bawat oras (kph) malapit sa gitna at bugso na umaabot sa 90 kph, habang kumikilos west northwest sa bilis na 25 kph.
Kabilang sa mga lugar na nasa ilalim ng Signal No. 1 ang Romblon, Occidental Mindoro (kabilang ang Lubang Islands), Oriental Mindoro, Marinduque, Batangas, at ilang bahagi pa ng Luzon at Visayas. Sa ilalim ng Signal No. 1, asahan ang malalakas na hangin at mahihinang hanggang katamtamang pag-ulan sa loob ng 36 oras. Maaaring makaranas ng bahagyang pinsala sa mga istruktura, mahihinang puno, at mga pananim sa ilang lugar.
Samantala, Signal No. 2 naman ang nakataas sa Aurora, Quezon (kabilang ang Polillo Islands), Camarines Norte, at ilang bahagi ng Camarines Sur, dahil sa banta ng mas malalakas na hangin sa loob ng 24 oras.
Ayon sa PAGASA, ngayong araw inaasahan na mas mararamdaman ng Central Luzon, CALABARZON at MIMAROP ang bagyo.
Dagdag pa ng PAGASA, posibleng mag-landfall ang sentro ng bagyo sa bahagi ng Quezon province ngayong umaga o hapon, bago tumawid sa Southern at Central Luzon at lumabas ng Philippine Area of Responsibility (PAR) sa Lunes, October 20.
