Nakatakdang repasuhin ng Philippine Ports Authority (PPA) ang aplikasyon ng port operator na Asian Terminals Inc. (ATI) para sa planong pagtataas ng passenger terminal fee sa Batangas Port mula ₱30 tungong ₱100.
Ayon kay PPA General Manager Jay Santiago, may malaking pasilidad at makabagong amenities ang passenger terminal sa Batangas Port na kayang magsilbi sa hanggang 8,000 pasahero. Ito ay pormal na inilunsad ni Pangulong Ferdinand Marcos Jr. Abril ng 2024.
“We will thoroughly study the application for a terminal fee increase… We need to balance the increase with the capability of the passengers and make sure that this would not be a burden to our commuters at Batangas Port,” ayon kay Santiago.
Sa ulat ng ABS-CBN, ilang lokal na opisyal — kabilang si Romblon Governor Trina Firmalo-Fabic — ang nagpahayag ng pagtutol sa panukalang dagdag-singil dahil ang mga pangunahing apektado umano nito ay mga estudyante, magsasaka, at mangingisda na dumaraan sa Batangas Port upang bumiyahe patungo sa mga isla.
Ayon kay Doan Bustamante, stakeholder affairs at communications manager ng ATI, gumastos ang kanilang kumpanya ng ₱1.5 bilyon para sa pagpapaganda ng imprastruktura sa Batangas Port, na hindi aniya ginamitan ng kahit anong pondo ng pamahalaan.
Dagdag pa ni Bustamante, mula pa noong 2010 ay hindi nagpatupad ng terminal fee sa Batangas Port.
Nilinaw naman ni Santiago na bahagi ng review process ng PPA ang pagsasagawa ng public hearing at pagtanggap ng mga komento at position papers mula sa mga stakeholders.
