Nagpahayag ng matibay na suporta ang mga lokal na punong ehekutibo at mambabatas mula sa MIMAROPA region sa State of the Nation Address (SONA) ni Pangulong Ferdinand R. Marcos Jr. noong July28, na kanilang tinawag na malinaw at komprehensibong plano para sa inklusibong pag-unlad at tumutugon na pamahalaan.
Binigyang-diin ng mga lider ang pagtutok ng Pangulo sa mahahalagang sektor gaya ng imprastruktura, serbisyong panlipunan, at repormang institusyonal, na anila’y direktang tumutugon sa mga pangunahing pangangailangan ng mga lokal na pamahalaan sa isang arkipelagong rehiyon.
Ayon kay Romblon Mayor at League of Municipalities of the Philippines–Romblon President Gerard Montojo, malinaw na nakasentro sa social services, infrastructure, at institutional reform ang mensahe ng Pangulo. Pinuri niya ang pagtutok sa climate-resilient infrastructure, subsidized rice programs, at coconut replanting initiative, lalo na’t ramdam sa mga isla gaya ng Romblon ang epekto ng pagtaas ng lebel ng dagat.
Kinilala rin ni Montojo ang paninindigan ng Pangulo laban sa katiwalian sa flood control projects, na tinawag niyang “timely, urgent, at essential para ibalik ang pananagutan at protektahan ang buhay ng mamamayan.”
Sinabi naman ni Romblon Lone District Representative Eleandro Jesus Madrona na malinaw na ipinapakita ng SONA ang “hands-on concern” ng Pangulo at ang matinding hangaring maibsan ang hirap ng taumbayan.
Para kay Oriental Mindoro 1st District Representative Arnan C. Panaligan, malinaw na “road map” ang SONA para sa ikalawang hati ng termino ng Pangulo, lalo na sa mga planong nakatutok sa agrikultura, kalusugan, at edukasyon.
Ibinida rin ni Rizal, Palawan Mayor Norman Ong ang malaking tagumpay ng administrasyon sa electrification program, kung saan mahigit 2.5 milyong kabahayan na ang napailawan sa loob ng tatlong taon.
Buong suporta naman si Occidental Mindoro Representative Leody “Odie” Tarriela sa programa ng electrification, lalo na sa mga off-grid areas tulad ng kanyang lalawigan. Pinaboran din niya ang pagtutok ng Pangulo sa renewable energy at nanawagan sa DOE at ERC na pabilisin ang proseso para sa pagtatayo ng mga solar at wind farm.
Tiniyak ng mga opisyal na handa silang ipatupad sa lokal na antas ang mga pambansang programa at pinuri ang paninindigan ng Pangulo sa budget accountability, na mahalaga para sa tapat at epektibong paggamit ng pondo.
Ayon sa mga lider, tumutugon ang plano ng Pangulo sa mga natatanging hamon na kinahaharap ng mga lalawigang binubuo ng mga isla at hindi konektado sa national grid, at naniniwala silang mahalagang ituloy ang ganitong pamumuno para sa patuloy na pag-unlad ng rehiyon.
