Nagpahayag ng pagkadismaya si Rodne Galicha, dating kinatawan ng non-government organizations sa MIMAROPA Regional Development Council (RDC), kaugnay ng umano’y malaking pagkakaiba ng mga proyektong inirerekomenda sa rehiyon at ng aktuwal na nailalabas sa General Appropriations Act (GAA) taon-taon.
Ayon kay Galicha, sa loob ng 13 taon niyang pagiging bahagi ng konseho, palagi nang hamon ang hindi pagtutugma ng mga endorsed programs, projects and activities (PPAs) na naisama sa National Expenditure Program (NEP) at ng pinal na bersyon ng GAA.
“Bakit hindi natutugunan ang pangangailangan ng mga mamamayan sa naaaprubahang budget? Pinaghirapan ng mga LGU, SUCs, regional agencies at civil society organizations ang prosesong ito sa regional level, pero pagdating sa aprubadong budget, iba na ang lumalabas kumpara sa napag-aralan at na-endorso,” ayon kay Galicha.
Dagdag pa niya, matagal nang frustrasyon ng mga nasa rehiyon ang prosesong ito na tila nagkakaroon ng dagdag-bawas sa pagitan ng NEP at GAA.
“Saan nga ba nagkakaroon ng dagdag-bawas? Your guess is as good as mine,” dagdag pa niya.
Lumabas ang mga pahayag ni Galicha kasabay ng isyu kaugnay ng mga flood control projects at sinasabing insertions ng mga proyekto at pondo sa pambansang budget na kasalukuyang iniimbestigahan.
