Patuloy ang pakinabang ng mga manggagawa at komunidad sa MIMAROPA sa mga pangakong binitiwan ni Pangulong Ferdinand R. Marcos Jr. kaugnay sa trabaho at kabuhayan, batay sa mga ulat ng Department of Labor and Employment (DOLE) sa rehiyon.
Si Raymond Fabregas ng Oriental Mindoro ay isa sa mga jobseeker na agad na natanggap sa trabaho sa ginanap na job fair ng DOLE MIMAROPA. Aniya, malaking tulong ito sa kanyang pamilya matapos ang ilang buwang paghahanap ng trabaho.
Isa pang benepisyaryo ay si Enalyn Casao ng Puerto Princesa City na matagal ding nawalan ng trabaho. “Sobrang nae-excite po ako sa aking bagong trabaho… salamat sa Diyos at sa DOLE na din dahil nagkatrabaho na ako,” ani Casao.
Sa kanyang SONA noong 2023, binigyang-diin ni Pangulong Marcos ang pagtutok ng administrasyon hindi lamang sa paglikha ng trabaho kundi pati na rin sa pagpapatibay ng kakayahan ng bawat Pilipino. “More importantly, these programs seek to develop their productive potential and bridge their capacities towards self-sufficiency,” pahayag ng Pangulo.
Ayon sa DOLE, higit 192,000 manggagawa sa MIMAROPA ang nabigyan ng tulong sa ilalim ng Tulong Panghanapbuhay sa Ating Disadvantaged Workers (TUPAD) program ngayong 2024, kung saan halos ₱957 milyon ang naibuhos sa lokal na ekonomiya.
Samantala, sa ilalim ng DOLE Integrated Livelihood Program (DILP), 3,789 indibidwal at kasapi ng mga organisadong grupo ang nabigyan ng higit ₱68 milyong halaga ng startup capital at livelihood materials. Kabilang dito ang mga proyektong gaya ng seaweed farming sa Romblon at basket weaving sa Occidental Mindoro.
Bukod sa kabuhayan, pinrotektahan din ang karapatan ng mga manggagawa. Umabot sa ₱4 milyon ang naibalik na hindi nabayarang sahod at benepisyo sa 367 manggagawa matapos ang mga isinagawang inspeksyon ngayong taon. Mahigit ₱17 milyon pa ang naibigay sa 626 manggagawa sa pamamagitan ng Single Entry Approach (SEnA) ng DOLE.
Ayon kay DOLE MIMAROPA Regional Director Naomi Lyn C. Abellana, patuloy ang pagtutok ng kanilang tanggapan sa inklusibong pag-unlad sa rehiyon.
“Ang DOLE MIMAROPA ay nananatiling tapat sa pagbibigay proteksyon sa karapatan ng mga manggagawa at pagtulong sa kanilang kabuhayan,” ani Abellana. “Patuloy kaming magsisilbing tulay tungo sa mas matatag at masaganang komunidad sa rehiyon.”
