Ipinahayag ni Odiongan Mayor Trina Firmalo-Fabic ang kanyang komprehensibong plataporma sa larangan ng kalusugan bilang bahagi ng kanyang kampanya para sa pagka-gobernador ng lalawigan ng Romblon ngayong halalan.
Isa sa mga pangunahing layunin ni Firmalo-Fabic ay ang modernisasyon ng Romblon Provincial Hospital.
Kabilang sa mga plano ang paglalagay ng mga makabagong kagamitan tulad ng x-ray, ultrasound, at laboratoryo hindi lamang sa provincial hospital kundi pati na rin sa mga district at municipal hospitals sa iba’t ibang isla gaya ng Romblon District Hospital, Sibuyan District Hospital, Malipayon District Hospital sa Corcuera, at San Jose Municipal Hospital.
Target din ng kanyang programa na mapagaan ang pasanin ng mga pasyente sa paglalakbay patungo sa mga ospital sa labas ng lalawigan sa pamamagitan ng pagpapabuti sa serbisyo ng mga lokal na ospital. Kasama rin sa listahan ng mga pag-uukulan ng pansin ang Don Modesto Formilleza Hospital sa Looc, Tablas Island District Hospital sa San Agustin, at San Andres Municipal Hospital.
Kabilang pa sa mga inilahad na hakbang ay ang pagtiyak na may sapat na suplay ng gamot at serbisyong laboratoryo sa mga ospital, na maibibigay nang libre.
Plano rin niyang makipagtulungan sa mga munisipyo upang masiguro ang pagkakaroon ng 24/7 na operasyon para sa mga emergency cases sa mga lugar na walang sariling ospital.
Sa antas ng komunidad, isinusulong din ang suporta sa Barangay Health Stations upang mapunan ang pangangailangan sa gamot at kagamitan. Nakaangkla rin sa kanyang plataporma ang pagbibigay ng mental health programs para sa senior citizens, Persons with Disabilities (PWDs), at kabataan.
Isa pang mahalagang bahagi ng plano ay ang pagpapalakas ng health referral system. Layunin nitong makipag-ugnayan sa mga ospital sa Metro Manila sa pamamagitan ng mga memorandum of agreement (MOA) upang mapadali ang admission ng mga pasyente mula Romblon. Kalakip nito ang pagtatalaga ng pondo para sa medical assistance sa mga ospital sa labas ng lalawigan tulad ng sa Calapan, Aklan, Iloilo, Capiz, Batangas, at Maynila.
Ang mga hakbang na ito ay bahagi ng pangkalahatang adbokasiya ni Firmalo-Fabic na tinatawag na “Serbisyong May Puso Para sa Buong Romblon.”
