Tiniyak ni Vice Mayor Diven Fos Dimaala, tumatakbong alkalde ng Odiongan, na bibigyang prayoridad ng kanyang administrasyon ang kapakanan ng mga estudyante sa larangan ng transportasyon sa pamamagitan ng pagbibigay ng transportation subsidy sa mga mag-aaral mula sa mga hilaga at timog na barangay ng bayan.
Sa ilalim ng kanyang panukala, magkakaroon ng subsidiya ang mga estudyanteng gumagamit ng Tricycle Operators and Drivers Association (TODA) bilang pangunahing paraan ng transportasyon upang maibsan ang dagdag-gastos sa pamasahe araw-araw.
“Alam nating malaking bahagi ng araw-araw na gastusin ng mga estudyante ay napupunta sa pamasahe. Sa tulong ng subsidy na ito, mas maraming kabataan ang makakapasok sa eskwela nang hindi alintana ang layo,” pahayag ni Dimaala.
Bukod dito, isusulong din ni Dimaala ang paggamit ng online booking app para sa mga TODA sa Odiongan upang gawing mas moderno, episyente, at organisado ang sistema ng transportasyon sa bayan.
“Panahon na para isama natin sa digital age ang ating mga tricycle drivers. Sa pamamagitan ng app, mapapadali ang booking, monitoring, at maging ang seguridad ng pasahero at drayber,” dagdag ng bise alkalde.
Kasama rin sa kanyang plataporma ang pagbibigay ng accident at health insurance sa lahat ng mga lehitimong tricycle drivers sa Odiongan, bilang pagkilala sa mahalagang papel nila sa araw-araw na buhay ng mga Odionganon.
Panghuli, binabalak rin ni Dimaala ang pagtatayo ng isang transport terminal sa bahagi ng southern Odiongan upang gawing mas maayos ang takbo ng pampublikong transportasyon sa mga barangay na nasa timog na bahagi ng bayan.
Ang mga planong ito ay bahagi ng pangkalahatang adbokasiya ni Dimaala na ilapit ang serbisyong pamahalaan sa bawat mamamayan, lalo na ang mga kabataang nangangarap para sa mas maliwanag na kinabukasan.
