Isa sa mga pangunahing proyekto na isusulong ni Vice Mayor Diven Fos Dimaala, na tumatakbong alkalde ng Odiongan, ay ang pagtatayo ng isang modernong pampublikong aklatan o modern public library bilang tugon sa pangangailangan ng mga kabataan at estudyante sa makabagong pasilidad para sa pag-aaral at pananaliksik.
Ayon kay Dimaala, ang aklatang ito ay magiging bukas para sa lahat at magkakaroon ng digital access, reading areas, libreng WiFi, at mga pasilidad na angkop sa modernong panahon.
“Ang edukasyon ay hindi natatapos sa paaralan. Dapat may ligtas at maayos na lugar ang mga kabataan para matuto, magbasa, at mangarap. Kaya isusulong natin ang modern public library para sa bayan,” aniya.
Kaugnay nito, isinusulong din ni Dimaala ang paglalagay ng maliwanag na street lights sa mga bahagi ng Poblacion at mga barangay upang masigurado ang kaligtasan ng mga mamamayan tuwing gabi. Sesementuhin din ang mga municipal roads at pathways upang maging mas ligtas at maginhawa ang paglalakad at pagbibiyahe.
Kasama rin sa kanyang plano ang pagpapaganda ng mga kalsada at drainage system upang mapabuti ang daloy ng tubig-ulan at maiwasan ang pagbaha. Kanyang tatapusin ang Government Center na magsisilbing bagong municipal hall ng bayan upang mas mapaayos pa ang pagbibigay ng serbisyo publiko.
Dagdag pa rito, maglalagay rin ng mga MOVE (Men Opposed to Violence Everywhere) Centers, LCW (Local Committee on Women), at Senior Citizen Centers sa bawat barangay bilang bahagi ng pagpapalawak ng serbisyo para sa iba’t ibang sektor ng komunidad.
“Hindi lang ito mga gusali. Ang bawat proyektong ito ay para sa kaginhawahan, kaligtasan, at kinabukasan ng bawat Odionganon,” pahayag ni Dimaala.
Sa kabuuan, layunin ng mga proyektong ito na gawing mas sistematiko, moderno, at makatao ang imprastrukturang bayan, habang patuloy na binubuo ang pundasyon para sa pangarap ng Odiongan na maging lungsod sa hinaharap. #END
