Nagpahayag ng suporta si Senador Lito Lapid sa paninindigan ni Pangulong Ferdinand “Bongbong” Marcos Jr. na hindi kailanman isusuko ng Pilipinas ang alinmang bahagi ng teritoryo nito sa mga dayuhan, lalo na sa usapin ng West Philippine Sea.
Ginawa ni Lapid ang pahayag sa gitna ng kanyang pag-iikot sa mga bayan sa lalawigan ng Zambales nitong Lunes, kung saan nakalugar ang Bajo de Masinloc o Panatag Shoal—isa sa mga lugar na patuloy na pinagtatalunan sa pagitan ng Pilipinas at China.
Ayon kay Lapid, kailangang tiyakin ng pamahalaan na may sapat na proteksyon at suporta ang mga Pilipinong mangingisda na patuloy na humaharap sa pananakot at panggigipit mula sa mga banyagang barko sa naturang karagatan.
“Makakaasa po kayo, na sa susunod na Kongreso kung ako ay papalarin, ay magsusulong ako ng batas na poprotekta sa ating mga mangingisda, lalo na laban sa pang-aapi at pambubully ng dayuhang bansa,” pahayag ng senador.
Kasabay nito, nagpasalamat si Lapid sa patuloy na tiwala ng publiko sa kanyang liderato, kasunod ng kanyang pagkakasama sa Top 5-8 sa pinakahuling Pulse Asia survey.
Nagpahayag din siya ng pasasalamat sa mga taga-Zambales na mainit siyang tinanggap at tiniyak na magpapatuloy ang kanyang paglilingkod sa bayan kung muling mahalal.
