Bago ang isinagawang motorcade sa lalawigan ng Quezon, dumaan muna si Senador Lito Lapid sa Kamay ni Hesus Healing Church sa Lucban, kahapon, Abril 30.
Sa panayam, sinabi ni Lapid na dapat palakasin ng pamahalaan ang pilgrimage tourism sa bansa dahil maaari itong lumikha ng dagdag na trabaho at kita para sa mga Pilipino, lalo na sa mga lokal na manggagawa.
Kaugnay nito, nagpaabot din ng pagbati ang senador sa lahat ng manggagawang Pilipino sa selebrasyon ng Labor Day nitong Mayo 1.
Giit niya, ipagpapatuloy niya ang pagsusulong ng mga panukalang batas na magpoprotekta sa karapatan at kagalingan ng mga obrero, kabilang ang mga overseas Filipino workers (OFWs).
Sinaluduhan din ni Lapid ang sipag at tiyaga ng mga manggagawang Pilipino na aniya’y haligi ng ekonomiya ng bansa.
