Inilatag ni Odiongan Mayor Trina Firmalo-Fabic ang kanyang plataporma para sa kaunlaran ng lalawigan bilang bahagi ng kanyang kampanya sa pagka-gobernador ng Romblon, na layuning paigtingin ang lokal na ekonomiya at palakasin ang kabuhayan ng bawat Romblomanon.
Isa sa mga pangunahing hakbang sa ilalim ng kanyang adbokasiyang “Serbisyong May Puso Para sa Buong Romblon” ay ang pagpapalawak ng scholarship programs at technical-vocational training upang bigyang pagkakataon ang mga kabataan sa mas malawak na karera at hanapbuhay.
Kabilang din sa plano ang pagtatayo ng mga Provincial Livelihood and Innovation Centers upang magsilbing hub para sa mga maliliit na negosyo, kooperatiba, at mga lokal na produkto. May suporta ring nakalaan para sa mga Micro, Small and Medium Enterprises (MSMEs) upang mapatatag ang mga lokal na industriya.
Bilang tugon sa pangangailangan para sa mas mabilis at episyenteng serbisyo, isinusulong ni Firmalo-Fabic ang digitalization ng mga proseso sa pamahalaang panlalawigan upang maging mas transparent at accessible ang mga transaksyon ng publiko.
Sa sektor ng agrikultura at imprastruktura, isinusulong niya ang pagpapalawak ng mga farm-to-market roads at ang pagtatayo ng mga sustainable infrastructure projects para sa mas episyenteng pagdadala ng produkto sa mga pamilihan.
Sa turismo naman, layunin niyang gawing mas accessible ang Romblon sa mga lokal at dayuhang bisita. Kabilang sa mga plano ang pagbabalik ng commercial flights sa Tugdan Airport at pagdaragdag ng mga ruta ng barko upang mapadali ang pagbiyahe papunta at palabas ng lalawigan.
Bukod pa rito, inihain rin niya ang pagbibigay ng tax incentives para sa mga negosyong nais mamuhunan sa Romblon, bilang hakbang upang makahikayat ng mas maraming investors at kumpanya na lilikha ng trabaho sa lalawigan.
Ayon kay Fabic, ang platapormang ito ay bahagi ng mas malawak na layunin ni Firmalo-Fabic na itaas ang antas ng pamumuhay ng mga mamamayan at tiyaking hindi naiiwan ang alinmang bayan sa pag-unlad ng buong Romblon.
