Pangunahing tututukan ni Vice Mayor Diven Fos Dimaala, na tumatakbong alkalde ng Odiongan, ang pagpapalakas ng kakayahan ng mga magsasaka at mangingisda sa bayan. Layon ng kanyang plataporma na tiyaking may sapat na suporta, kagamitan, at oportunidad ang mga nasa sektor ng agrikultura at pangingisda.
Ayon kay Dimaala, mahalagang paunlarin ang lokal na produksyon at tiyaking naipagbibili nang maayos ang mga ani at huli ng ating mga magsasaka at mangingisda.
“Kung palalakasin natin ang kakayahan ng ating mga magsasaka at mangingisda, hindi lang sila ang uunlad kundi ang buong bayan,” ani Dimaala.
Plano niyang ipatupad ang pamimigay ng makinarya para sa pagsasaka, bangka at lambat para sa mga mangingisda, at paglalaan ng pondo para sa mga farmers' association upang mapaunlad ang mga proyekto at mapalawak ang kaalaman sa modernong pagsasaka at pangingisda.
Bukod dito, isusulong din ang modernisasyon ng pamilihan upang magkaroon ng maayos at abot-kayang espasyo para sa pagbebenta ng produkto.
Magpapatayo ng mas malawak na wet market, maglalagay ng cold storage facility para sa mas mahabang shelf-life ng mga paninda, at babawasan ang renta sa mga umuupa sa palengke. Dagdag pa rito ang pagtatayo ng covered area para sa mga local vendors at producers, dagdag na mga pwesto para sa nais magnegosyo, at isang malaking parking space para sa mga mamimili.
“Hindi sapat na may tanim at huli. Dapat may maayos, abot-kaya at sistematikong lugar para ito'y maibenta—iyan ang responsableng gobyerno,” dagdag pa niya.
Ang mga programang ito ay bahagi ng layunin ni Dimaala na itaguyod ang pag-unlad mula sa kabukiran at karagatan patungo sa mas maunlad at mas inklusibong ekonomiya para sa lahat ng Odionganon.
