Bilang pakikiisa sa selebrasyon ng Earth Day, inilunsad ng grupo nina Trina Firmalo-Fabic at Rodne Galicha, kapwa tumatakbo sa matataas na posisyon sa Romblon, ang kanilang green electoral agenda na naglalayong isulong ang pangmatagalang pangangalaga sa kalikasan para sa lalawigan.
Ayon kay Fabic, ang green agenda ay isang paninindigan para sa sustainable development—isang kaunlarang tumutugon sa pangangailangan ng kasalukuyan nang hindi isinasakripisyo ang kinabukasan ng susunod na henerasyon.
“Sa gitna ng krisis sa klima at walang humpay na pang-aabuso sa kalikasan, marapat lamang na bigyan natin ng pagpapahalaga ang ecosystem services at benepisyong nakukuha natin sa pagpapanatili nito,” pahayag ni Fabic.
Dagdag pa ni Rodne Galicha, isa ding kilalang environmental advocate, ang kanilang environmental platform ay hango sa Green Agenda 2025—isang malawakang panukalang binuo ng mga eksperto, civil society groups, at environmental organizations.
“Ito ay isang tugon sa mga kagyat na hamon sa kapaligiran na kinakaharap ng bansa, kabilang ang deforestation, polusyon, pagkawala ng biodiversity, at ang epekto ng pagbabago ng klima,” ani Galicha.
Ang Green Agenda 2025 ay isinusulong ng mga kilalang environmental groups gaya ng Caritas Philippines, Philippine Misereor Partnership, Inc., Center for Energy, Ecology and Development, EcoWaste Coalition, Living Laudato Si’ Philippines, Alyansa Tigil Mina, Greenpeace, Philippine Movement for Climate Justice, at ilang komisyon mula sa Catholic Bishops Conference of the Philippines.
