Mas pinabilis at pinasimple na ang proseso ng pamimigay ng ayuda sa ilalim ng mga programang Assistance to Individuals in Crisis Situation (AICS) at Ayuda sa Kapos ang Kita Program (AKAP) ng Department of Social Welfare and Development (DSWD) MIMAROPA.
Ito ay matapos pirmahan ng DSWD MIMAROPA, Land Bank of the Philippines (LBP), at Palawan Express ang isang kasunduan para sa pagpapatupad ng hybrid-digital payout system, na magbibigay-daan upang direktang matanggap ng mga benepisyaryo ang tulong pinansyal mula sa gobyerno.
Sa isinagawang pirmahan ng kontrata, lumagda sina Landbank Vice President Adeline Ramos at Palawan Express Key Accounts Supervisor Kenneth Enrico Amurao, habang si DSWD MIMAROPA Regional Director Leonardo C. Reynoso ang tumayong saksi. Pinangunahan din ni Director Reynoso ang pagpirma sa Data Sharing Agreement (DSA) kasama ang Landbank upang masiguro ang proteksyon ng datos ng mga benepisyaryo alinsunod sa Data Privacy Act.
Ayon kay Director Reynoso, layunin ng bagong sistema na gawing mas mabilis, ligtas, at episyente ang pamamahagi ng tulong pinansyal, lalo na sa mga nasa malalayong lugar. Dagdag pa niya, inaasahang makatutulong ito sa mas maayos na pamamahala ng pondo at mas pinadaling proseso ng liquidation.
Ipinahayag naman ni LBP VP Adeline Ramos ang kanilang buong suporta sa inisyatiba at sinabing isang karangalan para sa Landbank na maging katuwang ng DSWD sa pagbibigay ng agarang tulong sa mga nangangailangan.
Sa panig ng Palawan Express, tiniyak ni Amurao na bawat payout ay isasagawa nang may integridad, kahusayan, at malasakit, lalo pa’t tinatayang higit 650,000 benepisyaryo ang inaasahang sasaklawin ng programa.
Sa pamamagitan ng bagong sistemang ito, inaasahang mababawasan ang pagkaantala ng tulong at mas mapapalapit sa mga tao ang serbisyo ng pamahalaan.
