Nakalulungkot ang nangyaring trahedya kamakailan sa Apayao kung saan nasa 19 katao ang nasawi nang mahulog sa bangin ang trak na kanilang sinasakyan. Ang mga biktima na sinalanta noon ng bagyo, napilitang bumiyahe para makakuha ng ipinamimigay na tulong ng Department of Agriculture.
Mga residente ng Rizal, Cagayan ang mga biktima, at kinailangan nilang bumiyahe sa ibang barangay para kunin ang mga tulong tulad ng sako-sakong butil ng mga mais na kanilang itatanim. Ang kaso, inabot ng dilim sa daan ang mga biktima kaya naging mahirap na sa nagmamaneho ng trak lalo pa't sinasabing bumuhos din ang ulan.
Kung tama ang mga lumabas na ulat, sinasabing nagawi sa Conner, Apayao ang trak dahil may shortcut na daan daw patungo sa kanilang barangay. At dahil matatarik ang daan doon at umuulan pa nga raw, sinasabing nagloko ang makina ng trak, nawalan ng preno at nauwi na sa trahediya ang masaya sana nilang paglalakbay.
Bukod daw sa sobra-sobra ang pasahero ng trak, nadagdagan na rin ang bigat ng karga ng sasakyan pabalik nila dahil nga sa mga nakuha nilang mga sako-sakong binhi ng mais at iba pang gamit. Ang masaklap pa nito, wala raw sanang plano na magpaabot ng dilim sa daan ang mga biktima. Pero inabot sila ng dilim dahil hiningan pa raw ng ID ang ibang benepisasyong magsasaka at napilitan pang magpagawa para makakuha sila ng biyaya.
Dahil doon, naturang na kumain ng dagdag na oras ang kanilang biyahe at inabot nga sila ng dilim sa daan. Ang malaking katanungan, kung maaga kayang nakabalik sa kanilang barangay ang mga biktima, naiwasan kaya ang disgrasya? Maaaring oo, puwede ring hindi.
Ngunit ang tiyak, naiwasan sana ang disgrasya kung may mas maayos na plano ang DA sa pamahahagi ng tulong sa mga nasalanta ng kalamidad. Bakit hindi ang mga tauhan ng DA ang naghatid ng mga binhi sa bawat barangay para hindi na napilitang maghanap ng paraan ang mga biktima kung papaano iyon kukunin sa ibang barangay.
Wala ring bang maayos na ugnayan ang DA sa mga opisyal ng barangay at kailangang hanapan pa ng ID ang mga magsasaka? Aba'y iyong ngang mga maralita sa Metro Manila eh nangangamote sa pagkuha ng ID, ang mga magsasaka pa kaya na nabiktima ng kalamidad?
Hindi ito ang pagkakataon na may mga taong kukuha ng tulong sa gobyerno ang nadisgrasya dahil kailangan nilang bumiyahe para makakuha sila ng grasya. Noong Seytembre ng nakaraang taon, 14 katao na karamihan naman eh senior citizen ang nasawi rin nang mahulog sa bangin ang kanilang sinasakyang jeepney sa Kalinga.
Pabalik na sa kanilang barangay ang mga biktima matapos namang manggaling sa isang barangay na may ATM machine para makuha ang kanilang allowance sa ilalim ng Pantawid Pamilyang Pilipino Program. At gaya nang nangyari sa mga magsasaka na kumuha ng butil sa Cagayan, nawalan din preno ang sinasakyan ng mga biktima kaya nahulog sa bangin.
Pag-aaral na raw ng DA ang sistema ng pamamahagi nila ng mga binhi matapos ang sinapit ng mga magsasaka sa Cagayan. Natural, sasabihin nilang aksidente ang naganap at walang may nais na mangyari. Sana nga lang, maging pambulaga at panggising ang naganap na trahedya para hindi na maulit ang nangyari.
At sana, hindi rin ito mangyari sa mga naging biktima ng mga lindol sa Cotabato na labis na nangangailangan ng tulong. Baka naman kasi gawin lang sa isang lugar ang pamamahagi ng tulong at mapilitan pa ang ibang mga biktima na bumiyahe para makakuha rin ng tulong. Aba'y kung tutulong, lubos-lubusin niyo na lalo nang mga may planong tumakbo sa 2022 elections.
Tandaan: Ang tao'y nilalang na politiko at madalas ang politiko'y nanlilinlang ng tao!
(Twitter: follow@dspyrey)
