Marami ang nagulantang sa nangyari sa icon ng Philippine showbiz si Manoy Eddie Garcia nang bigla siyang isugod sa ospital dahil sa isang aksidente habang nagta-taping sa isa niyang teleserye.
Noong una, inakalang inatake sa puso ang beteranong aktor dahil bigla siyang natumba sa isang eksena sa kalye ng isang upcoming TV series ng GMA 7. Sabagay sa edad ni Manoy na 90, malamang na iyon kaagad ang iisipin ng mga tao sa set na baka inatake nga o na-stroke ang aktor.
Pero mabuti na lang at may nakakuha ng video nang pagbagsak niya nang pasubsob. Sa naturang video, marami ang nakapansin na sumabit ang paa ni Manoy sa kable. Pero siyempre, dahil unang kumalat ang balita na inatake siya sa puso, iisipan ng mga nakapanood na baka nga inatake muna siya sa puso kaya siya napatid.
Ang iba naman siguro, inisip na napatid muna siya at saka inatake sa puso matapos bumagsak.
Makalipas ng isang araw at masuri na sa ospital si Manoy, unti-unti nang nalinawan na hindi nga raw inatake sa puso ang hinahangaang aktor. Bagkos ay nagkaroon siya ng bali sa leeg dulot ng pagkakabagsak mula sa pagkakapatid sa kable batid sa nag-viral na video.
Habang isinusulat natin ito, “in deep sleep” pa rin daw at kritikal ang lagay ng ating idol. Ayaw yata nilang sabihin “comatose” dahil marahil sa “medical term” kasi nga eh hindi siya na-stroke [para maapektuhan ang kaniyang utak] o inatake [para naman sa puso]. Ngunit ang malinaw, ang dating masiglang 90-anyos na aktor na handa pa ring magtrabaho, nakaratay ngayon sa pagamutan.
Kaagad na pinuna ng ilang natin kurimaw na nakausap ang kable; bakit daw may kable sa dadaanan ng isang 90-anyos na artista? Naiintindihan natin ang ibig sabihin ng ating mga kurimaw, tila nagkaroon ng pagkukulang sa tamang mangangalaga sa isang nirerespeto at may edad na artista ang namamahala sa taping.
Lumilitaw din umano na walang “medic” at ambulansiya sa taping gayung “action scene” ang kanilang kukunan na maaaring magkaroon ng sakitan o aksidente,—na nangyari nga, at sa kinamalas-malasan pa ay sa isang sikat at nirerespetong artista.
Hindi naiwasan ng mga kurimaw natin na magtanong din kung bakit kailangan pang bigyan ng eksena na kailangan tumakbo ang isang 90-anyos na aktor? Kahit pa sabihin na ayaw ni Manoy na magpa-dobol o may ibang tao na gagawa ng kaniyang eksena, aba'y dapat naman yata na tiniyak na maayos ang lahat ng kaniyang gagalawan.
Linawin lang natin, wala tayong nais sisihin pero maraming tanong ang dapat mabigyan ng linaw. Habang isinusulat natin ito, tiniyak ng pamunuan ang GMA 7 na magsasagawa sila ng imbestigasyon sa pangyayari—kasama na ang lumabas sa video na tila pagkakapatid sa kable ng aktor at kung bakit walang nakaantabay na medic at ambulansiya sa location shooting.
Sa nangyari kay Manoy na lumitaw na nagkaroon siya ng bali sa leeg, dapat nakahiga siya at may suporta sa leeg nang dalhin sa ospital. Ganito ang ginagawa mga tsong sa mga naaksidente sa kalye para maiwasan na lumala ang pinsalang tinamo nila. Pero ang nangyari kay Manoy, dahil nga inakala ng mga tao sa taping na inatake siya, nakita sa mga larawan sa social media na binuhat siyang paupo at dinala sa ospital nang wala sa ambulansiya. Hindi natin alam kung nagalaw-galaw pa ang leeg niya habang isinusugod sa ospital.
Tiyak na pag-uusapan sa mga produksyon ng mga kompanyang gumagawa ng teleserye o pelikula ang nangyaring ito kay Manoy. Sana eh may mapulot silang aral tungkol sa nangyari kaugnay sa pagtitiyak sa kaligtasan ng mga tao na kasama nila sa shooting o taping—malaki man o maliit na artista, at pati na rin sa mga manggagawa.
Kung tutuusin naman eh hindi talaga maiiwasan ang aksidente sa anumang trabaho lalo na sa mga ganitong shooting at ma-aksyon ang mga eksena. Kahit nga sa Hollywood na ubod na ang ingat ay nagkakaroon pa rin ng mga sakuna. Hindi ba't sa aksidente sa shooting namatay ang anak ni Bruce Lee na si Bradon Lee dahil sa tama ng bala. Ilang sikat na artista na rin ang nasaktan at naospital dahil sa mga aksidente.
Kaya naman dapat lang na asahan na maaaring magkaroon ng mga aksidente sa taping o shooting. Dahil dito, dapat mas maging maingat sa mga eksena at bukod doon, dapat may nakaantabay na medical personal na kikilos kapag may nangyaring hindi maganda. Ipagdasal natin na makabawi sana si Manoy sa laban niyang ito.
Tandaan: Ang tao'y nilalang na politiko at madalas ang politiko'y nanlilinlang ng tao!
(Twitter: follow@dspyrey)
