Ipinag-utos ni Mayor Marvin “Greggy” Ramos sa mga tanggapan ng lokal na pamahalaan na iwasang magsagawa ng payout para sa mga senior citizen mula alas-10 ng umaga hanggang alas-2 ng hapon upang maiwasan ang heat stroke at iba pang panganib sa kalusugan dulot ng matinding init.
Ayon kay Ramos, nakipag-ugnayan na siya sa Municipal Health Office (MHO) upang matukoy ang mga posibleng epekto ng El Niño sa kalusugan ng mga residente at ang mga hakbang na dapat ipatupad upang maprotektahan ang mga ito.
Partikular na binigyang-pansin ng alkalde ang pamamahagi ng pensiyon at ayuda sa mga senior citizen dahil may mga benepisyaryong maagang pumipila, kung minsan ay isa hanggang dalawang oras bago magsimula ang payout, at naghihintay sa ilalim ng matinding sikat ng araw.
Dahil dito, inatasan din niya ang mga kinauukulang tanggapan na ilapit hangga’t maaari ang mga payout area sa mga benepisyaryo upang hindi na kailangang maglakad nang malayo ang mga matatanda.
Pinag-aaralan din ng lokal na pamahalaan ang paggamit ng mga sasakyan nito upang masundo o maihatid ang mga senior citizen na naninirahan sa malalayong lugar.
Binigyang-diin ni Ramos na hindi dapat ang mga benepisyaryo, lalo na ang mga senior citizen, ang mahirapang mag-adjust sa proseso ng payout. Sa halip, tungkulin ng pamahalaan na humanap ng paraan upang maging ligtas at maayos ang kanilang pagtanggap ng pensiyon at ayuda.
Tiniyak din ng alkalde na may nakatalagang health worker na nakaantabay sa bawat payout upang agad na makatugon sakaling magkaroon ng emergency o problemang pangkalusugan ang sinumang benepisyaryo.
