Ganap ng isang bagyo ang low pressure area (LPA) na binabantayan ng Philippine Atmospheric, Geophysical, and Astronomical Services Administration (PAGASA) matapos itong pumasok ng Philippine Area of Responsibility (PAR) nitong Sabado ng gabi.
Huling namataan ang bagyong pinangalanang Amang kaninang alas-4 ng umaga sa layong 460 km East bg Hinatuan, Surigao del Sur at gumagalaw patungong North Northwest sa bilis na 15 kph.
Sa ngayon nakataas na ang tropical cyclone warning signal number one sa southern portion of Eastern Samar, southern portion of Samar, Biliran, Leyte, Southern Leyte, Eastern Bohol, Northern Cebu, Agusan del Sur, Agusan del Norte, Surigao del Sur, Surigao del Norte, Dinagat Islands at Camiguin.
Taglay ng bagyo ang lakas na hangin na 45 kph at bugsong aabot sa 60 kph malapit sa gitna.
Sinabi ng PAGASA na asahan ngayong Linggo, January 20, ang moderate to heavy rains sa mga lugar ng Caraga, Northern Mindanao, Compostela Valley, Davao Oriental, Eastern Visayas, Central Visayas, Bicol Region, Southern Quezon, Marinduque at Romblon.
Moderate to heavy rin ang asahan bukas, January 21 sa Visayas, Bicol Region, Southern Quezon, Marinduque, at Romblon; gayun rin sa Martes, January 22, sa mga lugar sa Albay, Sorsogon, Catanduanes, Masbate, Eastern Visayas at Central Visayas.
Posible ang pagbaha at landslide sa mga nabanggit na lugar lalo na sa mga nakatira sa gilid ng bundok, at sa mababang lugar.
