Sa panahon natin ngayon na maraming nangyayari sa paligid ay mabilis tayong maapektuhan ng mga ito. Mga pagbabago na pwedeng maghatid sa atin ng lungkot at tuwa. Tulad ng mga problema sa pang-araw-araw natin na pamumuhay…ang mga pagtaas ng mga bilihin at mga walang katapusang pakikibaka sa buhay. Sa mabilis din na pagbabago ng ating kapaligiran ay ang mga matitinding problema na kaakibat nito. Tulad ng pagsulpot ng mga problemang pangkalusugan. Mga nakukuhang karamdaman sa mga pagkain, maling pangangalaga ng katawan, mga nakukuhang kemikal at polusyon hatid ng pag-unlad ng kapaligiran at ang dulot ng matinding pag-iisip o sobrang pagka-stress sa mga di kanais-nais na mga nangyayari sa ating buhay. Ayon sa tanyag na kasabihan na ang pinakamabisang gamot sa anumang karamdaman ay ang pagtawa…ang maging masaya ano man ang ating pinagdadaanan sa buhay.
Tunay nga na ang pagiging masayahin at positibo lagi ang pananaw sa buhay ay mabisang lunas sa anumang sakit na meron tayo. Ito man ay pisikal na karamdaman, pinansiyal, pakikisalamuha sa kapwa, emosyonal at maging sa ating ispiritwal na suliranin. Dahil kung masaya ang disposisyon natin sa buhay ay madali nating malulutas ang anumang mabibigat na kinakaharap natin sa buhay. Hindi magiging masaya si Lord kung tayo ay laging malungkot. At hind Niya iyon papayagang mangyari. Binibigyan Niya tayo ng mga pagsubok sa buhay hindi para tayo ay pahirapan bagkus para tayo ay magtiwala sa Kanya. Hindi Niya ibibigay ang anumang meron tayo ngayon na mga kapighatian at pasakit kung hindi natin ito kaya at kakayanin. Kung mas pipiliin lang natin na maging masaya sa kabila ng kapighatain na meron tayo ay mas makikita natin at malalaman ang magagandang plano ng Diyos. Wala namang buhay o tao na perpekto. Lahat tayo ay may pinagdadaanan. Na kahit minsan akala natin na sa atin na ang lahat ng kagandahan at kaginhawahan, meron pa ring isang bahagi n gating buhay na mali at may kulang sa ating pagkatao at sa ating buhay. Dahil si Lord lang ang perpekto at walang bahid ng kamalian at hindi Siya nagkakamali na bigyan tayo ng mga pagsubok. Binibigyan tayo ni Lord ng di magagandang karanasan sa buhay para tayo ay tumingala sa Kanya at matuto. Para tayo ay maniwala at magtiwala sa Kanyang kapangyarihan.
Lagi lang tayong ngumiti, tumingala sa langit at ipaubaya ang lahat sa ating Manlilikha. Nakatanaw lang Siya mula sa itaas at masaya tayong pinapanood. Naghihintay lang lagi Siya na marinig ang ating mga papuri at pasasalamat. Hindi ang ating mga hinaing at kahilingan. Dahil bago pa man Niya ibigay ang ating mga problema sa buhay ay mas nauna pa Niyang gawin ang mga solusyon para dito. Ang lahat ay isang pagsubok lamang at ang lahat ay may kasagutan lagi at makukuha lang sa isang dasal. At alam Niya ang bawat nais at kahilingan ng ating mga puso. Matuto lang tayo maghintay at ibibigay Niya ang lahat ng ito sa tamang oras na Kanyang itinakda.
Para sa akin madali lang naman ang maging masaya sa buhay. Makuntento lang tayo sa kung anong meron at laging magpasalamat sa mga biyaya na ating natatanggap, ito man ay maliit o malaki. Ang makita at pahalagahan ang mga mumunting bagay sa ating paligid. Ang tanggapin ng buong puso at isip ang lahat ng mga pagsubok at mabibigat na pinagdadaaan natin sa buhay. At higit sa lahat ang isuko ang lahat sa Poong Maylikha ang lahat ng meron tayo at kung ano tayo ng may malaking pagtitiwala, paniniwala at pananampalataya sa Kanya.
