Binisita kanina ni Pangulong Rodrigo R. Duterte ang lungsod ng Puerto Princesa kasabay ng mga aktibidad sa pagdiriwang ng Subaraw Biodiversity Festival o pagdiriwang ng Puerto Princesa Underground River (PPUR Day).
Sa kaniyang pananalita, sinabi ng Pangulo na nawa’y ang pagdiriwang ng subaraw biodiversity festival ay maging daan upang maitaguyod ang pagiging tanyag ng lalawigan ng Palawan at lungsod bilang pinakamagandang isla sa buong mundo.
“May this festival be an occasion to strengthen your solidarity and commitment to the reputation of Palawan as the best island in the world. I wish is Subaraw Biodiversity festival better success the years to come. (Nawa’y ang festival na ito ay ipagdiriwang upang mapalakas ang inyong pagkakaisa at naipangako sa ngalan ng Palawan bilang ‘best island’ sa buong mundo…hangad ko ang tagumpay ng pagdiriwang sa mga susunod na panahon),” nilalaman ng pananalita ng Pangulo sa ginanap na programa sa People’s Amphitheater sa Mendoza Park kanina.
Pinayuhan din ni Pangulong Duterte ang lokal na pamahalaan at mga kinauukulang ahensiya ng pamahalaan sa lungsod na tiyaking tatanggap ng bisita ang namamahala ng underground river nang naaayon lamang sa kapasidad nito.
Idinagdag pa ni Duterte ang payo sa LGU na maging ang mga tabing dagat ay dapat na mabantayan upang hindi mapuno ng mga establisyemento na walang itinatayong ‘water treatment’ at diretso sa tubig-dagat ang dumi.
Aniya, dapat na mapangalagaan ang turismo at kalikasan upang hindi matulad sa Boracay na nasalaula ang kayamanan ng lugar.
“Linisin niyo ‘wag lang i-overload, bantayan niyo ‘yan, ang Boracay ay nalagay sa kaso ng overloading, can’t carry over so much people, ‘pag punuin mo ‘yan, with all their waste, babagsak ‘yan, lalo na ang underground, you have to control the number of tourist, protect your crown jewel ng Palawan, iyong mga magagandang lugar, avoid overcrowding,” payo pa ni Duterte.
Tiniyak din ni Pangulong Duterte na hihigpitan ng gobyerno ang mga establisyementong pang-negosyo katulad ng mga hotel na itinatayo sa tabing dagat na kinakailangang maglaan ng puhunan upang makapagtayo ng pasilidad ng ‘water treatment’ upang hindi mapupunta sa dagat ang dumi ng mga ito.
Hiniling ni Duterte ang pakikipagtulungan at pakikiisa ng mga mamamayan sa pangangalaga ng kalikasan upang aniya ay hindi na maulit ang naging aksyon ng gobyerno sa pansamantalang pagsasara ng Boracay, saan man sa bansa.
Samantala, ang inilunsad ang Subaraw Biodiversity Festival ngayong taon na isang pang-internasyunal na kaganapan, bilang bagong katawagan sa pagdiriwang ng araw ng PPUR nang ito ay tanghaling isa sa ‘New Seven Wonders of Nature’ noong ika-11 ng Nobyembre, taong 2011. (Leila B. Dagot/PIAMIMAROPA-Palawan)
