Hindi maiwasan ng ating kurimaw na matawa sa ilang personalidad na naghahain ng certificate of candidacy na planong tumakbo sa iba’t ibang posisyon sa gaganaping May 2019 midterm elections.
May nagpakilalang hari ng mundo, asawa kuno ng sikat na celebrity, konektado o sugo ni Lord, at kung anu-ano pang kakenkoyan. Pero kung tutuusin, sabi ng ating kurimaw na pangarap ding maging politiko, mas mabuti pang pakinggan ang mga kandidatong ito (na kinalaunan ay tiyak na idedeklara ng Commission on Elections na mga nuisance o panggulo), kaysa doon sa mga “legit” na kandidato.
Bakit ka ninyo, karamihan sa mga “panggulong” naghahain ng COC eh dati na rin namang pumormang kakandidato. Halos tuwing may eleksyon, makikita mo sila sa tanggapan ng Comelec at nakikisabay sa paghahain ng kanilang kandidatura. Pero dahil wala naman silang kakayanan na magsagawa ng kampanya sa buong bansa, naturang na ididiskuwalipika sila.
Kaya ang ending, karamihan sa kanila ay masasabing “nagpapansin” lang at alam mo nang “harmless” sila at walang pinsalang idudulot sa bayan. Kung tutuusin, kahit papaano pa nga eh nakapagbigay sila ng “kasiyahan” kahit papaano sa mga pakulo nila.
Ang nakatatakot ay iyong mga politikong may kakayanang maglunsad ng pambansang kampanya at puwede pang manalo. At kapag nanalo, wala namang gagawin kung hindi tumunganga at isulong ang pansariling interes, at kapakanan ng kanilang mga padrino.
Natural na kapag gumamit ng pera at impluwensiya ang isang kandidato para manalo, wala sa taong-bayan ang utang na loob niya. Ang inisip niya, gumastos siya at babawiin niya ang ginastos niya. Kung may padrino na tumulong sa kaniya, ang iisipin niya ay malaki ang utang na loob niya sa padrino at hindi sa mga karaniwang botante na nakipagsiksikan para maiboto siya.
Gaya halimbawa nitong isang naghain ng COC na nagpa-picture lang pero naging allergic na matanong ng mga mamamahayag. Baka nga naman matanong siya tungkol sa “inflation” eh mangamote siya sa sagot. May isa naman sumagot pero aminadong walang alam sa isyu. Aba’y papaano niya matutulungan ang mga taong nagkakandakuba na sa pagmahal ng bilihin? Baka mag-iiyak lang siya kapag nanalo.
May isang kandidato naman na pa-“kiyeme” ang dating at panay ang tanggi noon na tatakbo siya. Pero nang maghain ng COC, aba'y sangkatutak ang tsuwariwariwap na kasama. Puna pa ng ating kurimaw, kay laking tao na eh parang nagsama pa ng tatay sa principal office. Papaano raw pagkakatiwalaan ang isang kandidato na walang isang salita gaya ni pakiyeme bet?
Pabebe naman ang pa-epek ng isa pang kandidato na nagsabi ring hindi raw tatakbo noong sinusuyo siya at pinapalutang ng isang grupo ang pangalan niya para isama sa ticket. At nang maglabas ng anunsyo bago pa man ang filing ng COC, hindi pa rin agad direktang inamin na tatakbo siya at parang sumakay lang ng jeep na nagpaligoy-ligoy pa.
Kung tutuusin, excited ang isa nating kurimaw na magdeklara ng kandidatura ang pabebeng kandidato. Hindi dahil sa iboboto niya ito kung hindi sabik siyang makita kung ano ang mga “meme” na maglalabasan tungkol sa kaniya.
Noong dati kasi siyang tumakbo, kung anu-anong alyas na “boy” ang idinikit sa pangalan niya. Ngayon pa lang, mukhang allergic na raw si pabebe boy sa mga netizen na tila hindi “friendly” ang mga komento sa kaniyang social media page. Ipinapa-block daw nito ang mga netizen na may mga “kwelang” at medyo matindi ang tanong lalo na kung may konek sa dati niyang mga posisyon.
Aba’y dapat pag-aralan ng mga magagaling at matatalinong handler ni pabebeng bet ang kaniyang socmed dahil kung hindi eh baka maiyak siya sa mga maglalabasan “meme” sa internet. Tandaan: Ang tao'y nilalang na politiko at madalas ang politiko'y nanlilinlang ng tao!
(Twitter: follow@dspyrey)
