Nakaraang Huwebes binuksan ng Comelec ang pagtanggap sa certificate of candidacy ng mga kakandidato, pati na ang mga “payaso” na planong kumandidato sa darating na 2019 mid-term elections.
Agad namang nagbabala na may kasamang pakiusap ang Comelec na huwag naman sanang gawing “circus” ang besinidad ng kanilang tanggapan sa paghahain ng COC na tatagal hanggang sa susunod na linggo [Oktubre 17]. Kadalasan kasi, may kaniya-kaniyang pakulo ang ilang kandidato tulad ng pagdadala ng mga banda at sangkatutak na supporters.
Hindi naman maiiwasan iyon kung tutuusin dahil may mga tagasuporta na gustong “sumipsip” sa kandidato. Kung manalo nga naman ang kanilang manok, baka makahirit sila ng kung anuman ang gusto nilang ipakiusap.
May kandidato rin na sadyang gumagawa ng ingay at pakulo para mapansin ng media—at sa panahon ngayon ng social media, baka nga naman maging “viral” ang kanilang post lalo na sa mga tatakbong senador.
Ibang usapan naman ang mga “panggulong” kandidato at may mga “sapak” na gusto ring magpapansin. Asahan na baka may mga “sugo” na naman ng kung ano-ano na maghahain ng kanilang kandidatura para sagipin ang mga Pinoy sa kung ano-anong delubyo.
Ngunit maliban siguro sa pag-aabang kung sino-sino ang mga tatakbong senador, tiyak na aabangan din kung anong posisyon ang tatakbuhan nina Foreign Affairs Secretary Alan Peter Cayetano, at ang dati niyang katandem sa Senate hearing na si Senador Antonio Trillanes IV.
Tapos na kasi ang termino ni Trillanes bilang senador at may posibilidad na siya ang tumakbo o gawing nominado sa kanilang partylist group na Magdalo, na kasalukuyang hawak ni Rep. Gary Alejano, na tatakbo namang senador.
Samantala, sa kaniyang Facebook post, may himig na ng pamamaalam sa Palasyo si Cayetano bilang kalihim ng DFA. At gusto ngang bumalik sa Taguig-Pateros.
Bago kasi naging senador si Cayetano kung saan nakasabay at naging buddy-buddy niya sa mga pagdinig si Trillanes para imbestigahan noon si dating Bise Presidente Jejomar Binay, naging kongresista muna ang kalihim.
Pero gaya nga ng pag-ibig na paminsan-minsan eh walang “forever,” unti-unting tumabang ang relasyon ng dalawa at nagkabanggaan bago pa ang 2016 elections kung saan pareho pa silang tumakbong bise presidente, at pareho ring natalo.
Sino nga ba naman ang makakalimot sa isang Senate hearing na sinabihan ni Trillanes si Cayetano na “hindi kita papopormahin.”
Kung panalo’t panalo rin lang ang pag-uusapan, masasabi ng ating kurimaw na mahilig sa penoy at balut na swak na sa timba ang panalo ni Cayetano. Si Trillanes naman, bagaman baka maging tagilid dahil mukhang gusto siyang ipakulong ng kasalukuyang gobyerno, kailangan din siguro nilang bantayan nang husto ang mga boto para sa kanilang partylist group na Magdalo at baka maglaho na parang bula.
Kapag nanalo si Cayetano, aba’y malaki pa sa ulo ng ET ang posibilidad na maging Speaker siya ng Kamara. At kung manalo naman si Trillanes at magpapatuloy ang kanilang hidwaan ni Cayetano, puwedeng siya naman ang maging House minority leader.
Kung mangyari nga ito, sino kaya sa kanila ang magsasabi naman ng, “hindi kita papopormahin?” Abangan natin ang susunod na kabanata.
Tandaan: Ang tao'y nilalang na politiko at madalas ang politiko'y nanlilinlang ng tao!
(Twitter: follow@dspyrey)
