Kung hindi dahil sa isang kongresista, aba’y hindi siguro mabibisto na may sinisingil palang P2 per minute ang ride-sharing service na Grab Philippines sa kanilang mga pasahero nang hindi nalalaman ng kanilang mga isinasakay.
Hindi natin alam kung metikuloso o kuripot lang itong kongresista pero mabuti na lang at humingi siya ng “itemized” o detalyadong listahan ng kaniyang binayaran nang sumakay siya sa Grab.
Ang sistema kasi, karaniwang resibo na ang ibinibigay ng mga drayber sa kanilang pasahero na nagsasaad ng kabuuang halaga ng napagkasunduan na babayarang pamasahe.
Ang ginawa ni Congressman dahil kongresista naman siya, humingi siya sa costumer service ng detalyadong breakdown ng binayaran niyang P400 na pamasahe.
Namahalan kaya si Congressman sa siningil sa kaniya o nabiktima rin kaya siya ng tinatawag na “surge pricing” o yung lumulobong presyo ng pamasahe kapag marami raw ang nagpapa-book.
Buweno, nang makuha nga niya ang breakdown, doon na niya nakita na kasama sa sinisingil ang P2 per minute sa pamasahe. Aba’y sa trapik ng kalsada natin na umaabot ng isang oras ang Makati mula Quezon City, tiyak na tiba-tiba sila sa “patong” na per minute kumpara sa “per kilometer” na pinapayagan ng mga awtoridad.
Ang matindi, hindi pala alam ng Land Transportation and Regulatory Board ang “patong” na singil. At kahit inamin ng Grab Philippines na hindi nila nasabihan ang LTFRB tungkol sa P2 per minute na singil, ikinakatwiran nila na pinapayagan naman daw sila sa ilalim ng Department Order (DO) 2015-11 na magtakda ng kanilang singil.
Pero nakalimutan yata nila na dapat na kahit pinapayagan sila ng naturang kautusan na magtakda ng sarili nilang singil sa pamasahe, dapat ipaalam nila sa LTFRB ang basehan ng kanilang singil tulad ng “flag rate” at “per kilometer.” Aba’y sa mga restaurant nga, nakalagay sa resibo kung may “service change” silang sinisingil o wala. Dahil dito, alam ng mga kostumer kung dapat pa ba silang mag-tip o hindi na.
Kung tama ang komputasyon ni Cogressman, aabot daw sa P1.8 bilyon ang nakuha ng Grab sa kanilang “nakatago” raw na P2 per minute charge na sinimulan noong Hulyo 2017.
Itinanggi ng Grab na itinago nila ang naturang singil pero sabi ni Congressman sa lumabas na mga ulat, nang silipin niya ang website ng kompanya, nakasaad umano na hindi naniningil ang Grab ng P2 per minute. Pero inalis raw ito at kinalaunan ay inilagay na ang naturang singil.
Hindi lang ito ang inirereklamo sa Grab, inirereklamo rin ng mga pasahero ang pahirapang pag-book, labis na taas ng singil sa pamasahe at may mga drayber na rin daw na nangongontrata at iba pa.
Pero ano ang magagawa ngayon ng mga pasahero lalo pa’t gumarahe na ang kakompitensiya nilang Uber? Ngayon pa lang, nakikita na ang magiging problema kapag walang kakompetensiya ang isang kompanya.
Kaya naman dapat bilisan na ang pagbibigay ng prangkisa sa posibleng maging karibal ng Grab—hindi lang isa, kundi dapat dalawa.
At kung talagang iligal ang P2 per minute charge nila, dapat na isauli iyon sa mga pasahero o gawing multa.
Tandaan: Ang tao'y nilalang na politiko pero mas madalas ang politiko'y nanlilinlang ng tao!
(Twitter: follow@dspyrey)
