Tinipon sa Odiongan ng Provincial Health Office sa pangunguna ni Dra. Ederlina Aguirre ang mga Barangay Captains at mga Chairman on Health ng lahat ng Barangay sa lalawigan ng Romblon nitong August 1-2, 2018 para dumalo sa Provincial Health Summit 2018 na may temang “Pag sama-sama, kayang kaya!”.
Layunin ng aktibidad na maturuan ang mga barangay officials ng tamang gagawin kung sakaling may mga residente silang may sakit o di kaya'y may outbreak ng isang sakit katulad ng dengue at chikungunya na madalas may kaso tuwing tag-ulan.
Ayon kay Dra. Aguirre, tinuruan sa dalawang araw na summit ang mga barangay officials kung paano puksain ang mga lamok na may dala ng dengue at chikungunya, kung ano ang dapat gawin para mabawasan at maiwasan ang kaso ng rabbies, TB, HIV, at iba pang sakit.
Diniscuss rin sa nasabing summit ang kasalukuyang kundisyon ng Provincial Health System ng Romblon, ang mga gagawin sa mga drug dependence, mga vector borne disease. Tinuruan rin sila kung paano mag draft ng mga ordinansa at resolution na may kaugnayan sa kalusugan ng kanilang mga kabarangayan.
Natuwa naman ang mga dumalo kagaya ng mga galing pa ng Sibuyan Island dahil malaking tulong umano ito lalo na sa kanilang lugar na iisa lang ang ospital.
Hinikayat naman ni Dra. Aguirre ang mga barangay official na maglagay ng LGU Health scorecard na nakapaskil para alam nila kung marami ba silang dapat ayusin sa kanilang mga health services, at para malaman rin kung anong mga dapat mapondohan pagdating sa kalusugan ng kanilang mga nasasakupan.
Ang ginanap na health summit para sa mga barangay stakeholders ay ang kauna-unahang summit na ginanap sa lalawigan. Ayon kay Dra. Aguirre, plinaplano na nila na magsagawa muli sa susunod na taon para malaman nila ang update kung maganda ba ang performance ng mga barangay officials pagdating sa usaping pangkalusugan ng kanilang nasasakupan.
