Ipinakilala ng Romblon District Jail ang larong pickleball sa mga Persons Deprived of Liberty (PDL) at jail personnel sa pamamagitan ng lecture at skills enhancement activity bilang bahagi ng mga programang naglalayong palakasin ang pisikal na kalusugan at rehabilitasyon ng mga PDL.
Pinangunahan ni Skills Enhancement Officer J02 Riza Malsi ang aktibidad, kung saan tinalakay ang kasaysayan ng pickleball, mga pangunahing patakaran, kagamitan, teknik sa paglalaro at mga benepisyo nito sa kalusugan.
Kabilang sa mga itinuro ang tamang paggamit ng paddle at bola, serving techniques, scoring system, player positioning, basic strokes at mga tuntunin sa laro.
Binigyang-diin din sa orientation ang kahalagahan ng disiplina, teamwork, respeto, fair play at sportsmanship—mga pagpapahalagang inaasahang maisasabuhay hindi lamang sa paglalaro kundi maging sa pang-araw-araw na buhay.
Ayon sa Romblon District Jail, bukod sa pagiging pisikal na aktibidad at libangan, makatutulong ang sports sa pagpapabuti ng kalusugan at kapakanan ng mga PDL, pagpapalakas ng pakikipagkapwa, paglinang ng disiplina sa sarili at pagharap sa stress.
Bahagi ang aktibidad ng patuloy na programa ng Romblon District Jail na nagbibigay ng mga oportunidad sa mga PDL para sa makabuluhang rehabilitasyon at personal na pag-unlad sa pamamagitan ng sports at iba pang recreational activities.
Patuloy namang isinusulong ng Bureau of Jail Management and Penology (BJMP) ang mga programang naglalayong palakasin ang rehabilitasyon at mahikayat ang positibong pagbabago sa mga PDL sa pamamagitan ng makataong paglilingkod at mga gawaing pangkaunlaran.


























