Naglabas si Pangulong Ferdinand Marcos Jr. ng Executive Order No. 130 na nagtatakda ng iisang balangkas para sa suspensiyon at pagpapatuloy ng face-to-face classes, mga aktibidad sa paaralan at onsite work sa mga pampubliko at pribadong institusyong pang-edukasyon at learning center.
Layunin ng kautusan na palakasin ang kahandaan sa sakuna at matiyak ang pagpapatuloy ng pag-aaral, habang inuuna ang kaligtasan ng mga mag-aaral at kawani ng paaralan.
Itinatakda ng EO ang tatlong mekanismo sa pagsuspinde: awtomatikong suspensiyon kapag naabot ang itinakdang teknikal na pamantayan, suspensiyong idineklara ng mga lokal na punong ehekutibo, at suspensiyong ipinatutupad ng mismong paaralan batay sa pagsusuri sa partikular na lugar.
Sa ilalim ng awtomatikong mekanismo, suspendido ang klase at onsite work kapag naglabas ang PAGASA, PHIVOLCS, DENR-EMB o iba pang kinauukulang ahensiya ng babala o alertong pasok sa itinakdang teknikal na pamantayan. Hindi na kailangan ng hiwalay na deklarasyon.
Kung walang awtomatikong suspensiyon, maaaring magdeklara ang mga lokal na punong ehekutibo ng suspensiyon batay sa dokumentadong pagsusuri sa panganib at aktuwal na kondisyon. Kailangan nilang makipag-ugnayan sa mga kinauukulang ahensiya at kumonsulta sa mga opisyal ng barangay, Schools Division Superintendent at pinuno ng mga pribadong paaralan tungkol sa saklaw at tagal nito.
Maaari namang magpatupad ang mga paaralan at learning center ng granular suspension, katuwang ang kanilang lokal na pamahalaan, kung may aktuwal o napipintong banta sa kaligtasan, kalusugan o kapakanan ng mga mag-aaral at kawani.
Itinatakda rin ng EO ang mga kondisyon sa pagbabalik ng klase at onsite work. Maaari itong magpatuloy kapag natapos ang panahon ng suspensiyon o inalis, ibinaba o nag-expire ang kaukulang babala, alerto o deklarasyon, matapos ang kinakailangang pagsusuri at inspeksiyon sa kaligtasan.
Maaari ring humiling ang paaralan ng mas maagang pagbabalik ng klase habang umiiral pa ang lokal na suspensiyon, kung may pagsang-ayon ng lokal na punong ehekutibo at dokumentadong pagsusuring nagpapatunay na ligtas na ang lugar.
Binigyang-diin din ng kautusan na hindi awtomatikong nangangahulugan ng paghinto ng pag-aaral ang suspensiyon ng face-to-face classes. Inaatasan ang mga institusyong pang-edukasyon na magpatupad ng angkop na alternatibong paraan ng pagkatuto hangga’t maaari, alinsunod sa mga patakaran ng ECCD Council, DepEd, CHED at TESDA.
Itinalaga ang DepEd bilang pangunahing ahensiyang mangangasiwa at magmomonitor sa pagpapatupad ng EO at maglalabas ng mga kinakailangang alituntunin. Makikipag-ugnayan naman ang DILG sa mga lokal na pamahalaan, habang magbibigay ng teknikal na impormasyon at hazard advisories ang PAGASA, PHIVOLCS at DENR-EMB.
Inatasan din ang DPWH na magsagawa ng pagsusuri sa mga pasilidad ng paaralan at kaugnay na imprastraktura na naapektuhan ng sakuna o iba pang hazard, at magbigay ng teknikal na tulong sa mga lokal na pamahalaan.
Nakaangkla ang kautusan sa Republic Act No. 10121 o Philippine Disaster Risk Reduction and Management Act of 2010, at iba pang batas na may kaugnayan sa paghahanda sa sakuna at pagpapatuloy ng edukasyon.
