Gumamit ang Department of Social Welfare and Development (DSWD) ng digital payment system upang mapabilis at mapadali ang pamamahagi ng tulong pinansyal sa ilalim ng Unified Package for Livelihoods, Industry, Food, and Transport (UPLIFT) Assistance Program.
Ito ang sinabi ni DSWD MIMAROPA Regional Director Allyp Albert Baybayan sa isinagawang Kapihan sa PIA Romblon nitong October 28.
Ayon kay Baybayan, nasa ikatlo at ikaapat na tranche na ng pamamahagi ng tulong ang ahensya para sa mga benepisyaryo ng programa.
Kabilang sa mga hakbang ng DSWD ang pakikipag-ugnayan sa mga Financial Service Provider (FSP), gaya ng mga bangko at mobile wallet application na GCash, upang maihatid ang ayuda sa pamamagitan ng digital na transaksiyon.
Isa sa mga tinututukan ng ahensya ang proseso ng Know Your Customer (KYC), na kinakailangan para sa beripikasyon ng pagkakakilanlan ng mga benepisyaryo. Kabilang dito ang mga walang smartphone, email address o sariling numero ng telepono na maaaring kailanganin sa digital na pagtanggap ng tulong.
Upang matugunan ang suliraning ito, nakikipagtulungan ang DSWD sa mga FSP na nagsasagawa ng KYC sa mga lokalidad at komunidad, lalo na para sa mga benepisyaryong nahihirapang kumpletuhin ang mga kinakailangan sa digital payment system.
Ayon kay Baybayan, maaari ring magamit ang sistemang ito sa mga susunod pang programa at serbisyo ng ahensya.
Layunin din ng digital na sistema na mapabilis ang proseso ng pagbibigay ng tulong sa mga returning client at makatulong na maiwasan ang dobleng pagtatala ng mga benepisyaryo sa mga programa ng pamahalaan.
