Inatasan ni Pangulong Ferdinand “Bongbong” Marcos Jr. ang mga kinauukulang ahensiya ng pamahalaan na palakasin ang seguridad sa mga paaralan at pagbutihin ang maagang pagtukoy sa mga senyales ng posibleng karahasan sa mga mag-aaral.
Ayon kay Presidential Communications Office (PCO) Undersecretary at Palace Press Officer Claire Castro sa isang press briefing sa Cagayan de Oro nitong Martes, nais ng Pangulo na mabigyan ng sapat na pagsasanay ang mga guro at iba pang kawani ng paaralan upang matukoy ang mga palatandaan ng problema sa pag-uugali ng mga bata.
Ani Castro, dapat tumanggap ang mga guro ng gabay mula sa mga psychologist at psychiatrist upang mas maunawaan ang mga senyales na maaaring mangailangan ng agarang atensiyon at angkop na interbensiyon.
Inatasan din ang mga paaralan na palakasin ang koordinasyon sa mga magulang, opisyal ng barangay at social worker upang mas maagap na matugunan ang mga sitwasyong maaaring humantong sa karahasan.
Kabilang din sa mga direktiba ang pagpapakilos sa mga opisyal ng barangay at barangay tanod upang palakasin ang pagbabantay sa paligid ng mga paaralan.
Kasunod ang direktiba ng magkahiwalay na insidente na kinasangkutan ng mga menor de edad, kabilang ang isang 12-anyos na estudyanteng umano’y natagpuang may dalang baril malapit sa isang elementary school sa Misamis Oriental noong Oktubre 22, at isang 13-anyos na mag-aaral na umano’y nanaksak sa 11-anyos nitong kamag-aral sa Davao City noong Oktubre 24.
Samantala, iminungkahi ng Department of Education (DepEd) ang paglalaan ng ₱500 milyon sa panukalang pambansang badyet para sa 2027 upang palakasin ang mga hakbang sa seguridad at kaligtasan sa mga paaralan, kabilang ang mga tauhan, pasilidad at programang naglalayong protektahan ang mga mag-aaral.
Ayon kay Castro, may 45,994 learner formation officer na nakatalaga sa mga paaralan sa buong bansa, habang 36,713 paaralan ang may itinalagang mga tauhan na nangangasiwa sa paghubog ng pagpapahalaga, disiplina, pakikilahok ng mga mag-aaral at maagang pagtugon sa mga suliraning panlipunan, emosyonal o pang-asal.
Pinalalakas din ng Department of Social Welfare and Development (DSWD) ang mga programa nito upang maturuan ang mga magulang at guro na mapansin ang mga pagbabago sa pag-uugali at palatandaan ng emosyonal na paghihirap ng mga bata, sa tulong ng mga social worker.
Kabilang sa mga tinututukan ang paggabay sa mga magulang sa pag-unawa sa mga posibleng senyales ng panganib sa mga batang madalas na nag-iisa o nasasangkot sa mga potensiyal na mapaminsalang aktibidad online.
Ayon kay Castro, layunin ng mga hakbang na matiyak na may sapat na kaalaman ang mga guro at kawani ng paaralan upang mas magabayan ang mga mag-aaral at maagapan ang mga problemang maaaring mauwi sa karahasan.
