Kusang sumuko sa mga opisyal ng barangay ang itinuturong suspek sa pamamaril na ikinasawi ng isang 64-anyos na lalaki sa Santa Fe, Romblon, matapos ang ilang oras na pinaigting na manhunt at follow-up operations ng pulisya nitong September 12, 2026.
Ayon sa Santa Fe Municipal Police Station (MPS), bandang alas-6:56 ng gabi nang kusang sumuko ang 67-anyos na suspek, residente ng Barangay Pandan, Santa Fe, sa dalawang opisyal ng barangay. Kasunod nito, bandang alas-7:10 ng gabi, itinurn-over siya sa mga tauhan ng Santa Fe MPS para sa kaukulang police procedures at dokumentasyon.
Naganap ang pamamaril bandang alas-6:40 ng umaga sa Sitio Centro, Barangay Canyayo, na nagresulta sa pagkamatay ng isang 64-anyos na lalaking residente ng bayan.
Pagdating sa himpilan, ipinaalam sa suspek ang kanyang mga karapatang konstitusyonal bago siya isinailalim sa police custody. Isasailalim din siya sa kinakailangang medical examination bago tuluyang ma-detain.
Sumailalim din ang suspek sa paraffin test sa Romblon Provincial Forensic Unit sa Odiongan.
Samantala, inihahanda na ng Santa Fe MPS ang kaso ng Murder laban sa suspek para sa pagsasampa nito sa pamamagitan ng inquest proceedings sa Office of the Provincial Prosecutor sa Odiongan, Romblon.
Discussion about this post