Umabot sa 793 ang naitalang kaso ng dengue sa lalawigan ng Romblon mula Enero hanggang Oktubre 2026, kabilang ang pitong nasawi, batay sa datos ng Provincial Epidemiology and Surveillance Unit (PESU).
Sa ulat ng Philippine Daily Inquirer, pinakamaraming kaso ang naitala sa San Fernando na may 238, sinundan ng Cajidiocan na may 198. Sa kabuuang bilang, 312 ang laboratory-confirmed, 137 ang probable at 344 ang suspected dengue cases.
Bukod sa dengue, nakapagtala rin ang Provincial Health Office (PHO) ng iba pang notifiable diseases sa parehong panahon.
Umabot sa 212 ang kaso ng typhoid fever, kung saan 61 ang mula sa bayan ng Romblon at 55 sa Odiongan. Sa bilang na ito, 210 ang gumaling habang isang pasyente ang umalis laban sa payong medikal.
Nakapagtala rin ng 108 kaso ng influenza-like illness (ILI), kabilang ang 106 suspected at dalawang confirmed cases. Pinakamarami rito ang naitala sa Odiongan na may 34, sinundan ng San Agustin na may 28. Lahat ng pasyente ay nakaligtas.
Samantala, umabot sa 42 ang kaso ng hand, foot and mouth disease (HFMD), na karamihan ay mga batang edad 10 pababa. May tig-pitong kaso ang Odiongan at Magdiwang. Walang naitalang nasawi.
Nakapagtala rin ang lalawigan ng 17 kaso ng leptospirosis, kabilang ang 14 suspected at tatlong probable cases. Isa ang nasawi habang 16 ang gumaling. Pinakamarami ang naitala sa Cajidiocan na may apat na kaso, sinundan ng Odiongan na may tatlo.
Mayroon ding 11 ulat ng measles-rubella. Tatlo rito ang mula sa Ferrol at dalawa sa bayan ng Romblon. Sa isinagawang laboratory examination, isang kaso ng rubella ang nakumpirma, walo ang classified as non-measles/non-rubella cases at dalawa ang naghihintay pa ng resulta. Walang naitalang nasawi.
Dahil dito, hinimok ng Provincial Department of Health Office (PDOHO) Romblon ang mga residente na panatilihing malinis ang kapaligiran, sundin ang wastong kalinisan at mga hakbang sa pag-iwas sa sakit, at agad na kumonsulta sa doktor kapag nakararanas ng mga sintomas.
Binigyang-diin ng tanggapan na mahalaga ang pakikilahok ng komunidad upang maiwasan ang pagkalat ng mga sakit na naipapasa sa pamamagitan ng lamok at kontaminadong tubig.
