Inaresto ng mga tauhan ng Odiongan Municipal Police Station (MPS) ang isang 51-anyos na lalaki matapos umano itong magdulot ng kaguluhan sa Barangay Ligaya, Odiongan, bandang alas-10:20 ng gabi.
Batay sa paunang imbestigasyon, nagsumbong sa pulisya ang isang 62-anyos na mamahayag at residente ng nasabing barangay, matapos umano siyang sigawan at pagbuntunan ng masasakit at mapanuyang salita ng suspek habang siya ay nakaupo sa harap ng isang tindahan.
Ayon sa reklamo, nagtungo rin umano ang suspek sa bahay ng complainant at nagpatuloy sa pagsigaw at pagdudulot ng kaguluhan, na umano'y nakaalarma sa mga kalapit na residente.
Agad na rumesponde ang mga pulis at nadatnan umano ang suspek na gumagawa ng malakas na ingay at nagdudulot ng kaguluhan sa lugar. Matapos itong pakalmahin, inaresto ang suspek at dinala sa Odiongan MPS para sa kaukulang dokumentasyon at iba pang proseso.
Inihahanda ang mga kasong paglabag umano sa Article 155 (Alarms and Scandals) at Article 287 (Unjust Vexation) ng Revised Penal Code laban sa suspek.
