Magsasagawa ng araw-araw na pagsusuri sa kalidad ng tubig sa baybaying-dagat ng Odiongan ang Bureau of Fisheries and Aquatic Resources (BFAR) at mga katuwang na ahensya upang matukoy ang posibleng dahilan ng pagkamatay ng mga isda na iniulat noong October 4 at 6, 2026.
Layunin ng monitoring na makalikom ng baseline data na magsisilbing batayan sa pagsusuri ng mga posibleng salik sa kapaligiran na maaaring nakaapekto sa mga isda.
Sa inter-agency meeting noong October 9, nakipagpulong ang BFAR Provincial Fisheries Office (PFO) Romblon sa lokal na pamahalaan ng Odiongan, SALAPANGBA Team, Municipal Fisheries and Aquatic Resources Management Council (MFARMC), Philippine Coast Guard (PCG), PNP Odiongan at PNP Maritime upang talakayin ang mga insidente at pag-ugnayin ang mga hakbang sa monitoring.
Kabilang sa susukatin ang temperatura ng tubig, dissolved oxygen, salinity o alat ng tubig, at pH. Susuriin din ang lalim ng tubig at kondisyon ng pagtaas at pagbaba ng tubig-dagat o tides.
Batay sa paunang field investigation at mga panayam ng BFAR-PFO Romblon, kasama ang lokal na pamahalaan, may mga ulat na hindi pangkaraniwang mainit ang tubig-dagat sa mga apektadong tidal flat noong naganap ang mga insidente.
Isinasaalang-alang ang mataas na temperatura ng tubig bilang posibleng salik, lalo na sa panahon ng matinding sikat ng araw at low tide. Gayunman, kailangan pa ng karagdagang monitoring at pagsusuri upang matukoy ang aktuwal na sanhi ng pagkamatay ng mga isda.
Iniulat ang mga insidente sa mga intertidal zone ng Barangay Canduyong, Panique, Gabawan at Libertad sa Odiongan. May kahalintulad ding insidente na iniulat sa bayan noong 2024.
Binigyang-diin ng BFAR MIMAROPA na ang mga insidente ay kasalukuyang iniuuri bilang reported fish mortality at hindi pa kumpirmadong fish kill. Hindi pa natutukoy ang sanhi habang nagpapatuloy ang imbestigasyon at pagsusuri sa kalidad ng tubig.
Sa pamamagitan ng koordinadong monitoring at pagtutulungan ng mga ahensya, layunin ng BFAR at mga katuwang nito na makalikom ng maaasahang datos, mapalakas ang pagsusuri sa kondisyon ng kapaligiran, at makapagpatupad ng napapanahon at nakabatay sa siyentipikong ebidensya na mga hakbang upang maprotektahan ang yamang-dagat at mga komunidad ng mangingisda.
