Ipinagdiwang ng Technical Education and Skills Development Authority (TESDA) Romblon ang ika-32 anibersaryo nito noong Agosto 18, 2026 sa pamamagitan ng motorcade at programa na isinagawa sa bayan ng Alcantara.
Nilahukan ng mga Technical-Vocational Institutions (TVIs) sa lalawigan ang motorcade na nahati sa dalawang ruta. Bumiyahe ang isang grupo mula Calatrava–San Andres–Ferrol–Looc–Alcantara, habang ang isa pang grupo ay dumaan sa San Agustin–Santa Maria–Alcantara.
Sinundan ito ng Thanksgiving Mass at programa sa Alcantara, kung saan nagsilbing guest speaker si San Agustin Mayor Aaron James Madrona.
Nagkaloob din ng Certificates of Recognition sa mga natatangi at mahusay na Technical-Vocational Institutions bilang pagkilala sa kanilang ambag at performance sa pagpapaunlad ng technical-vocational education and training sa lalawigan.
Samantala, sinabi ni Madrona na inaasahang tataas ang pondong ilalaan para sa TESDA ngayong taon matapos dagdagan ito sa pondo ng opisina ni Congressman Budoy Madrona.
Mula sa tinatayang ₱4 milyon na pondo noong nakaraang taon, inaasahang aabot umano sa ₱17 milyon ang pondo ngayong taon, o katumbas ng tinatayang 400 porsiyentong pagtaas.
Inaasahang magbibigay-daan ang mas malaking pondo sa pagpapalawak ng mga programa at oportunidad sa technical-vocational education and training upang mas marami pang Romblomanon ang makinabang
