Ipinahayag ni Romblon Gov. Trina Firmalo-Fabic ang suporta ng Pamahalaang Panlalawigan sa Smart Islands Program ng Department of Science and Technology (DOST), na naglalayong gamitin ang agham at teknolohiya upang mapabuti ang pamamahala at matugunan ang pang-araw-araw na pangangailangan ng mga komunidad sa mga isla.
Ginawa ni Firmalo-Fabic ang pahayag sa pagbubukas ng 2026 MIMAROPA Regional Science, Technology and Innovation Week (RSTW) sa Odiongan noong Agosto 17, kasabay ng paglulunsad ng DOST-MIMAROPA ng “Smart Islands Rising: Technology Launches for Mobility, Water Security, and Resilience.”
Tampok sa inisyatiba ang mga teknolohiyang naglalayong tugunan ang mga hamon sa transportasyon, seguridad sa tubig, kaligtasan sa karagatan, episyensiya sa enerhiya at disaster resilience ng mga island community.
Kabilang sa mga ipinakita ang TRIPSY, isang mobile application para sa pag-book ng tricycle; SAFEWATRS, isang mobile at solar-powered water purification system; SEAWAVES, isang watercraft tracking and communication system; at CharM o Charging in Minutes, isang teknolohiyang nagpapabilis sa pag-charge ng mga electric tricycle.
Ayon kay Firmalo-Fabic, mahalaga ang pakikipagtulungan ng DOST sa mga lokal na institusyon upang matiyak na ang mga science, technology and innovation (STI) intervention ay nakabatay sa aktuwal na pangangailangan ng mga komunidad.
Binigyang-diin din ng gobernador ang kahilingan ng Pamahalaang Panlalawigan sa DOST na tumulong sa pagdi-digitize ng mga rekord sa Romblon District Hospital, na inaasahang magpapabilis sa paghahatid ng impormasyon ng mga pasyente sa iba't ibang departamento ng ospital.
“We don’t have to reinvent the wheel. We can adapt existing technologies,” ani Firmalo-Fabic.
Ayon sa gobernador, maaaring iangkop at gamitin ang mga umiiral nang teknolohiya upang mas mabilis na makapaghatid ng mga solusyon sa mga pangangailangan ng mga komunidad.
Tiniyak din ni Firmalo-Fabic ang patuloy na suporta ng Pamahalaang Panlalawigan sa DOST at iba pang national government agencies sa paghahatid ng mga science and technology-based solutions sa iba't ibang bahagi ng Romblon.
Ginanap ang 2026 RSTW mula Agosto 17 hanggang 19, kung saan nagsisilbing host ang Romblon sa kauna-unahang sabayang pagdiriwang ng RSTW sa limang lalawigan ng MIMAROPA.
Layunin ng selebrasyon na palakasin ang pagtutulungan sa science, technology and innovation at ipakita ang mga teknolohiyang makatutulong sa inclusive, resilient at sustainable development ng mga island community.
