Palalawakin ng Department of Science and Technology (DOST) ang mga teknolohiyang naglalayong mapabuti ang access sa ligtas at maaasahang suplay ng tubig sa mga komunidad sa Romblon, kabilang ang paggamit ng desalination technology.
Ayon kay DOST Secretary Renato U. Solidum Jr., may mga teknolohiya nang ginagamit ang ahensya sa lalawigan para sa water purification at nais pa nilang dagdagan ang mga intervention, partikular sa mga lugar na nakararanas ng kakulangan sa suplay ng tubig.
“Dito po sa DOST, meron po tayong mga naimbento na mas murang purifier ng mga tubig at balak namin dagdagan pa ang SAFEWTRS Technology dito sa probinsya ng Romblon,” ani Solidum.
Sinabi rin niya na kabilang sa mga planong teknolohiya ang pagkuha ng tubig mula sa dagat sa pamamagitan ng desalination.
“Yung pagkuha po ng tubig galing sa tubig dagat through desalination, maglalabas din po tayo niyan. Solarize pa sana para bawas ang gastos sa kuryente,” dagdag niya.
Ayon kay Solidum, makatutulong ang paggamit ng solar energy upang mapababa ang operating cost ng mga water systems, lalo na sa mga island community na nahaharap sa mataas na gastos sa enerhiya.
“We hope it will help improve access to safe and reliable drinking water,” ani Solidum.
Binanggit din ng kalihim ang mga water intervention na isinagawa sa Carabao Island, kung saan nakaranas ang mga komunidad ng kakulangan sa suplay ng tubig.
Ayon kay Solidum, mahalaga ang pagpapalawak ng mga teknolohiyang pangtubig sa isang lalawigang binubuo ng maraming isla dahil maaaring magkakaiba ang pangangailangan at access sa basic services ng bawat komunidad.
Binigyang-diin niya na ang paggamit ng science and technology ay dapat nakatuon sa paglutas ng aktuwal na problema ng mga komunidad at pagpapabuti ng kalidad ng buhay ng mga mamamayan.
